Mahimuot ko magbasa niining pipila ka mga opisyal nga wala makasabot nganong nitumaw ang mga community pantry sa tibuok nasud. Ang labing ulahi nakong nakit-an mao sa DILG spokesman Jonathan Malaya.
Taas-taas man unta ko og pagtan-aw niining Malaya. Apan nakuhaan gyud og dako-dako kini dihang nisugyot siya nga ihatag ngadto sa barangay ang tahas sa pag-apod-apod sa mga donasyon nga iyaha sa mga community pantry.
Una, nitumaw ang mga community pantry tungod sa kadaghan karon nga nag-antos sa kagutom tungod sa dakong kakulangan sa kagamhanan.
Wala pa masulbad ang Covid-19 ug nagkadaghan ang nawad-an og trabaho. Imbes unahon sa kagamhanan ang pagpalit og bakuna, nangutang man gani og dako kaayo, apan giuna hinuon ang mga donasyon.
Unya, duna bay dugang ayuda ang kagamhanan?
Ikaduha, unsa may mahimo ang moagi sa barangay? Dinhi sa Syudad sa Sugbo, naa pa gani kanang Milo. Pila ra man ang matibuok ang ayuda nga moabot sa mga kabus? Kadakong kalipay sa mga kurakot.
Naa man gani koy nabal-an nga amiga diin ang duha ka bulan nga financial aid alang sa iyang bed-ridden nga inahan giswetik pa gyud sa taga Milo.
Ang punto: daghang kurakot nga naa sa barangay ug ubang mga pang-barangay nga opisina sa kagamhanan. Mao gani, nga nangunay mismo ang mga gustong motabang karon kay di kasaligan ang naa sa kagamhanan.
Laing wa makasabot unsa kining community pantry mao si Mayor Edgar Labella. Iyang gigamit karon ang market administrator aron mokolekta og mga donasyon aron kunohay ihatag sa mga community pantry.
Mayor, kon ang Syudad sa Sugbo na lang ang mogahin og pundo alang sa igong ayuda?
Dayon, kinahanglan gyud kuno mo-coordinate sa barangay. Aron imong ma-monitor ang mga community pantry dinhi sa Syudad sa Sugbo?
Di man ka pareho ni Quezon City Mayor Joy Belmonte ug Pasig Mayor Vico Sotto nga maayo kaayo og relasyon sa mga nagpasiugda og community pantry. Naproblema man gani si Mayor Belmonte sa abusadong mga sakop sa iyang kapulisan.