SUPERBALITA CEBU

Espinoza: Hulga sa katungod?

Nagpakabana

Mora’g usik ang preparasyon sa Dakbayan sa Sugbo alang sa pagpadayon sa pagbakuna sa katawhan kay wala pa gipadala sa Department of Health (DOH) ang dugang nga bakuna alang sa dakbayan. Ang kadagkoan ra sa DOH ang nakahibawo sa hinungdan nganong ilang gihunong ang pagpadala sa dugang mga bakuna alang sa Probinsya sa Sugbo o sa Central Visayas.

Gani, gipun-an ang vaccination centers sa Dakbayan sa Sugbo, matod sa Vaccination Advisory Board (VAB). Ang tagdumala sa SM Seaside mall sa SRP nihatag og luna aron magamit sa pagbakuna. Ang duha nga nag-una nga vaccination centers sa Dakbayan sa Sugbo mao ang UC Campus sa Barangay Kasambagan ug Robinsons Galleria.

Maayo unta og dili matinuod ang akong pagduda nga ang pagpugong sa DOH sa pagpadala sa dugang nga mga bakuna alang sa listahan sa A2 tungod kay ubos na kaayo ang takod sa Covid-19 dinhi sa Sugbo samtang sa Metro Manila ug mga silinganan nga probinsya daghan pa gihapon ang mga natakdan ug nangamatay.

Matod pa sa DOH Central Visayas Case Bulletin niadtong Dominggo, Abril 25, ang mga aktibong kaso sa Covid-19 sa Dakbayan sa Sugbo mikunhod sa 889 gikan sa 898, samtang sa Dakbayan sa Lapu-Lapu dunay 738, ug ang Dakbayan sa Mandaue dunay 488. Ang Probinsya sa Sugbo dunay 1,082, Bohol, 837, Negros Oriental, 348 ug ang Siquijor 18.

Magpadayon pa ni nga moubos ang takod sa Covid-19 labina kon mapaspasan og bakuna ang katawhan unya di ta mokumpiyansa. Ato gihapon ipadayon ang atong naandan na nga pagsul-ob sa mask ug face shield kon anaa ta sa publiko o dapit nga daghan ang tawo, panghugas sa kamot og sabon o pamutang og alcohol, ug ato usab nga tumanon ang social distancing. Kini nga mga pamaagi napruybahan na nga makapugong sa takod sa Covid-19.

* * *

Didto sa mga probinsya sa Caraga Region, dunay hulga sa dakop sa mga sakop sa Alliance of Concerned Teachers (ACT). Duna koy pag-umangkon nga maestra nga nakadawat og impormasyon nga isunod siya og dakop sa kapulisan sa kaso nga murder sa pasangil nga dunay siyay kalabutan sa mga napatay nga pulis atol sa engkwentro sa kapulisan batok sa mga NPA sa ilang rehiyon. Pung pa sa akong pag-umangkon nga mahadlok man gani siya sa pusil.

Kon tinuod man ugaling ning taho sa akong pag-umangkon, di ko makatuo nga mao ni ang sitwasyon karon sa Caraga region. Ang pagpasakop sa usa ka organisasyon wa gidili sa atong balaod ug kagamhanan gawas sa mga pundok, nga krimen ang katuyoan ug di ba alang sa pagpukan sa atong kagamhanan.

Trabaho sa atong kapulisan ang pagpasaka og kaso sa mga nakasalaud apan kinahanglan ilang subayon ang mga lagda ug balaod subay sa atong Batakang Balaod. Ang kapulisan nakahibawo nga ang pagtumo-tumo og kaso sa usa ka tawo dunay sukli. Apan, ato ba ni sabton nga ang atong hudikatora wa na magpakabana sa katungod sa katawhan subay sa atong Batakang Balaod?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!