Ang mga medical frontliner maoy giuna sa kagamhanan sa pagbakuna. Apan sa ilang hut-ong, daghan gihapon ang nagdumili. Bisan kon duna pay wa mabakunahi sa mao nga sektor, ang mga local government (LGU) sa mga siyudad sa Sugbo ug Lapu-Lapu nakahukom sa pagbakuna sa mga senior citizen inay huwaton pa ang medical frontliners.
Ang City Health Department sa Dakbayan sa Lapu-Lapu nakabantay nga 65 porsyento sa medical frontliner lang ang nagpabakuna. Human sa upat ka adlaw nga pagpamakuna, ilang nabantayan nga mas daghan pa ganing senior citizens nga gustong magpatusok.
Bisan tuod kon duna pay mga LGU nga unang mibakuna sa ilang pinili nga senior citizens ug mga lumolupyo nga dunay comorbidity, ila gihapong gihimo nga prayoridad ang mga medical frontliner kay mao kini ang polisiya nga gipatuman sa kagamhanan agig pagsunod sa guidelines sa World Health Organization (WHO). Apan di man kalikayan nga dunay mga tawo nga mangahadlok. Ang unang matang sa tawo nga di gustong magpabakuna mao ang duna gyuy kahadlok magpatusok sa bisan unsa nga brand sa bakuna.
Ang ikaduha mao ang tawo nga gustong magpili sa brand nga iyang ipagamit sa pagbakuna kaniya. Masabot nga dunay di gustong magpabakuna gamit ang Sinovac kay gikan lagi sa China. Bisan kon daghan sa mga tambal nga gigamit sa Pilipinas ug namatud-ang epektibo kaayo, gikan sa China, naa gihapoy nagtuo nga di kini maayo. Naa say uban nangahadlok sa AstraZenica tungod sa mga taho sa blood clotting sa ubang nasod, bisan wa pa mahitabo dinhi sa Pilipinas.
Kon duna gihapoy magdumili sa pagpabakuna, di na sila angay panghuwaton. Kon dunay senior citizens nga magdumili sa pagpatusok, kinahanglan mo-move on ngadto sa sunod nga hut-ong nga mas gusto ug wa mahadlok magpabakuna.
Kay gikinahanglan ang paspas nga pagbakuna aron maangkon na sa nasod ang herd immunity nga maoy tumong.