ARMAS nga giingong gigamit sa paghikog ni Police Staff Sergeant Celso Colita wala motakdo sa mga basiyo sa bala nga nakuha sa crime scene sa patayng lawas ni Ritchie Nepomuceno alyas “Miles.”
Kini nagpasabot nga managlahi nga armas ang gigamit sa duha ka insidente sa kamatayon.
Gikompirmar sa hepe sa Cebu City Police Office Police (CCPO) Colonel Josefino Ligan nga aduna nay resulta sa ballistic exam sa armas ni Police Staff Sergeant Celso Colita nga iyang gigamit sa matod pa paghikog niini sulod sa pansayan sa Regional Drug Enforcement Unit (RDEU) 7 niadtong Abril 19 sa gabii.
Matod ni Ligan nga gipaubos usab kini sa cross matching sa mga basiyo sa armas nga nakuha sa taga scene of the crime operation (Soco) sa pagpusil-patay kang Nepomuceno sa Barangay Basak sa Siyudad sa Sugbo ug wala kini magkatugma.
Nagpasabot matod pa kini sigun ni Ligan nga managlahi ang armas nga gigamit kang Nepomuceno ug ang gigamit ni Colita sa pagpusil sa iyang kaugalingon.
Dugang ni Ligan nga ang investigation on case nagpadayon sa ilang imbestigasyon ug ilang gihangyo ang legal nga bana niini nga si Danilo Nepomuceno nga mokooperar sa kapulisan sanglit ang gitutukan nila karon ang ilegal nga drugas nga ni-complicate sa love triangle.
Una nang mibutyag ang bana sa dihang nahinabi sa mga tigbalita nga nakig-uli niya si Miles apan iya kining gibalibaran tungod sa relasyon niini sa usa ka drug lord nga naa sa sulod sa Cebu City Jail.
Wala mohingan una si Ligan kinsa ang maong drug personality tungod kay gipaubos pa kini nila sa imbestigasyon.
Dugang ni Ligan nga si Miles maoy gihimong bodegera sa drug lord ug bankera diin ang tanang kita sa ilegal ga drugas didto moagi kaniya aron maoy modeposito sa bangko.
Samtang gipaabot pa usab ni Police Brigadier General Ronnie Montejo, hepe sa Police Regional Office )PRO) 7, ang kompletong investigation report sa CCPO labot sa pag hikog patay ni Colita ug ang paggawas niini sa kampo uban sa escort niini nga si Police Corporal Christopher Lorete. (AYB)