Dura: Maayo kaha nga sirhan ang rehiyon?

SUBAY sa akong naobserbahan samtang nagbiyahe, dunay rason ang pag-apela ni Davao City Mayor Sara Duterte-Carpio ngadto sa Regional Inter-Agency Task Force (RIATF) Against Covid-19 nga ipailawom ang Davao Region sa "semi-closed border."

Dihang niuli ako sa among probinsiya sa Surigao del Sur sa Caraga Region, di na istrikto ang mga awtoridad sa pagsusi sa mga pasahero gikan sa maong lugar pasud dinhi sa siyudad sa Davao.

Sa akong pagbiyahe, pipila ka lungsod sa maong rehiyon ug dinhi sa rehiyon onse, di na istrikto mao nga misaka ang ihap sa kaso sa Covid-19 sa miaging mga adlaw.

Suma sa atong pinangga nga mayor, unod sa suwat sa siyudad ngadto sa RIATF nga aprobahan ang mas istrikto nga "screening measures" alang sa mga mobiyahe nga moagi sa mga checkpoints sa rehiyon sayo ning bulana.

Giingon nga nangayo na og komento ang Department of the Interior and Local Government (DILG), isip "lead chair" sa ahensiya sa RIATF, ngadto sa mga mayores sa tibuok rehiyon labot sa maong suwat.

"Hopefully, something will come out of it na ma-semi sirado ang atoang region except for those essential travelers, and then kita diri, sa region, we work on our existing around 800 cases," sulti sa mayor.

Ang apela sa siyudad base sa rekomendasyon sa Department of Health (DOH) Davao Region aron pahugtan ang "screening measures" sa mga checkpoints sa utlanan rehiyon. Kini nga tinguha giingon nga maoy moputol pagtakboy sa kagaw ngadto sa mga tawo.

Tungod niini, ang gihimo sa DILG mao ang pagkonsulta sa mga lokal nga opisyales sa rehiyon. Apan wa nila giapil pagkonsulta ang uban pang mga rehiyon. Kon mahitabo kini, nakaseguro ako nga daghan unya nga mga sektor ang apektado.

Nasabtan nako ang tumong sa siyudad sa Davao. Apan mas maayo tingali nga konsultahon ang nasyonal nga kagamhanan ug mga opisyales sa kasikbit nga mga rehiyon aron sa ingon matimbang-timbang pag-ayo ang polisiya.

Sa sama niini nga tinguha, mas maayo nga sundon nato ang prinsipyo sa "cost-benefit analysis" sa policy-making process. Kay sa nahitabo nato karon nga halos kitang tanan ang apektado, kinahanglan nato ang labing epektibo nga solusyon diin ang tanang sektor ang makabenepisyo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph