NA-RESCUE sa awtoridad ang usa ka 17 anyos nga lalaki kinsa namaligya og marijuana atol sa gihimong buy-bust operation sa Baliok Police Station didto sa sa Amarillo Street, Dacoville Subdivision, Barangay Dumoy, Davao City, Abril 23, 2021.
Ang menor de edad mao si alyas Marc, 17, estudyante ug nagpuyo sa nasampit nga dapit.
Subay sa report nga nakig-transaksiyon ang nahisgutan nga mobaligya og marijuana, apan wa kini kabalo nga mga nagtakuban nga pulis ang iyang kustomer, hinungdan nga gisikop kini.
Nakuha sa posisyon sa dinakpan ang mga putos nga dunay pinaugang dahon sa marijuana ug P500 nga marked money.
Anaa sa kustodiya sa Women and Children Protection Desk (WCPD) sa Baliok police ang nahisgutang menor de edad.
Sumala ni Major Joenel Pederio, station commander sa Baliok police nga nakatakdang i-turnover sa Quick Response Team for Children's Concern ubos sa City Social Welfare and Development Office alang sa tukmang interbensyon ug disposasyon sa menor de edad. (Jeepy P. Compio)