GAWAS sa gisugyot nga "semi-closed border" sa tibuok Davao Region, usa ka opisyal gikan sa Department of the Interior and Local Government (DILG) nagbutyag sab nga si Davao City Mayor Sara Duterte-Carpio nihangyo sab nga ang rehiyon mag-imposar og reglamento sa pagsulod sa mga pribadong behikulo.
Gisulti ni DILG-Davao Alex Roldan sa paghinabi kaniya sa radyo nga nakadawat siya og laing suwat-sugyot gikan kang Duterte-Carpio nga gipadala ngadto sa Regional Inter-Agency Task Force (RIATF) Against Covid-19, mag-imposar og regulasyon sa pagsulod sa mga pribadong sakyanan sa rehiyon pinaagi sa paggamit og "odd-even scheme" sa mga plaka-numero sa pagsulod ug paggawas sa rehiyon.
Si Roldan, kinsa pabor sa maong sugyot, nagkanayon nga duna nay lugak nga pagmonitor sa mga pribadong sakyanan nga mosulod ug mogawas sa rehiyon.
"Ang isa sa mga di kaayo nabantayan is kaning mga private cars/vehicles. Kaning mga gasulod-gawas diri sa [region]. Relax naman ta niana. Kana ang gitan-aw nga basi'g mao na ang weakest link probably," pung pa niya atol sa paghinabi sa 87.5 FM Davao City Disaster Radio.
Kahinumdoman nga gibutyag ni Duterte-Carpio niadtong Lunes, Abril 26, nga ang siyudad sa Davao nag-apela ngadto sa regional body nga ipailawom ang tibuok rehiyon sa "semi-closed border" aron nga di magdasig sa mga di esensyal nga biyahe nga ang tumong lamang mao ang paglulinghayaw pagsulod ug paggawas sa rehiyon nga base sab sa rekomendasyon sa Department of Health-Davao Region.
Kini nahitbo human nga mga kaso sa Covid-19 sa pipila ka bahin sa nasud padayon nakasinati og pagtaas ug ning bag-o nadiskobre ang bag-ong Covid-19 variants sa kasikbit nga mga probinsiya sa Mindanao. (Ralph Lawrence G. Llemit)