SUBLING gibaha ang pipila ka dapit sa Davao City sa dul-an usa ka oras nga pag-ulan Lunes sa gabii, Abril, 26.
Gibaha ang mga dapit sa norteng bahin labi na sa Sasa, Tibungco, Panacan ug Bunawan area.
Gibahaan sab ang mga tunghaan sa Bunawan District sama sa Daniel Perez Central Elementary School.
Sumala sa school head sa maong tunghaan nga si Riza Joy Sarile nga ilang giseguro sa pagbutang sa taas nga bahin ang mga records sa ilang mga tinun-an.
Gibahaan sab ang pipila ka mga ubos nga bahin nga mga kalsada sa Jose P. Laurel Avenue ug sa McArthur Highway.
Nagpasidaan si Davao City Disaster Risk Reduction and Management Office Chief Alfredo Baluran ngadto sa publiko nga mag-amping ug labing mayo nga ibutang sa luwas ang gamit aron dili maabot sa baha.
Ang pag-ulan resulta sa localized thunderstorms nga nakaapekto sa Mindanao nga makasinati og panalagsang pagdag-um ngadto na sa mapanganuron nga kalangitan inubanan sa patak-patak nga pag-ulan.
Hinay ngadto sa kasarangan nga hangin magagikan sa amihanang silangang direksiyon ug hapsay ngadto sa kasarangan ang pagbalud sa kadagatan.