Dear Atty. Joan,
Usa ko ka inahan sa tulo ka bata nga nagpangedaron og 20, 12 ug singko anyos.
Niadtong Pebrero o kapin duha ka buwan na ang milabay, kalit nga miabot sa among panimalay ang igsuong babaye sa akong bana. Sa wa pa kini miadto sa among panimalay, dili na maayo ang buot sa akong bana ug iyang igsuon. Ang ugat sa ilang kagubot mao nga dunay kabit ang iyang igsuon bisan pa man nga dakong minyo kini.
Sa maong pagbisita sa igsuon sa akong bana, dala niya ang iyang kabit. Sa dihang nagstorya ang akong bana ug iyang igsuon, nagsiningkahay sila ug milanog ang ilang mga tingog kay nadala sa emosyon. Wala namo damha nga gidapatan sa kabit sa akong sister-in-law ang akong bana. Mao nga giuwang dayon sila sa akong kinamagwangang lalaki.
Gabii nahitabo ang maong kagubot. Nangatulog na unta ang duha nako ka mga bata nga menor de edad. Pagkakita nila nga nagkagubot, naluoy tawon ko sa akong bata nga nagsige og syagit tungod sa kahadlok. Nasamdan sad ang akong eldest nga lalaki human sa hitabo.
Duna gyuy epekto ang maong hitabo sa akong mga bata labaw na sa akong kinamanghuran nga babaye. Ultimo ang paghot sa iro sa among silingan makahatag na og kahadlok sa akong bata human sa insidente. Kon duna pod siya makit-an nga susama og paporma sa iyang iyaan, makulbaan dayon ang akong batang babaye. Mao nga nibiya lang sa mi kadyot sa among panimay human sa insidente. Gipangguba pod nila ang pipila ka bahin sa among panimalay sa paghawa namo.
Unsa may pwede makaso atong iyaan ug kabit niya? Ganahan unta ko nga mapanubag sila sa kadaot nga gihimo sa akong mga batang menor de edad.
Salamat ug more power kanimo!
Imong magtatampo,
Janna
Dear Janna,
Maayong adlaw usab kanimo, Janna, ug salamat sa imong pagsunod niining lindog.
Mahimo nimong mapanubag ang iyaan ug iyang kabit sa posibleng trauma nga resulta sa kagubot sa inyong panimalay niadtong Pebrero subay sa Child Abuse Law.
Matod pa sa maong balaod, makonsiderar ang usa ka akto nga “child abuse” kon dunay pagmaltrato bisan kausa ra kini mahitabo. Usa ang “psychological” abuse sa mga porma sa child abuse nga giila sa atong balaod. Dili kinahanglan nga pisikal nga naabuso ang bata aron matawag nga child abuse.
Tataw nga babag sa paglambo sa usa ka bata ang kahadlok nga nahatag sa imong mga bata human sa insidente tali sa imong bana ug iyang igsuon labaw na sa imong singko anyos nga batang babaye nga dunay mga timailhan sa “trauma.”
Aron mahibaw-an kon dunay psychological effect ang maong hitabo sa imong mga menor de edad nga bata, maayo nga magpakonsulta kamo og psychologist aron ma-diagnose sila sa ilang nasinati.
Maayo pod nga ipa-blotter ninyo sa barangay o kapolisan ang maong hitabo labaw na nga nasamdan pod ang imong batang lalaki sa tinguha nga dili magrabehan ang imong bana sa pagpanakit sa iyang igsuon og kabit.
Daghang salamat sa imong sulat tampo ug hinaot nakahupay ang maong tambag sa naghoot mo karon nga galamhan.
Imong alagad,
Atty. Joan
[Lindog sinuwat ni Atty. Joan Saniel-Amit, executive director inubanan sa mga abogado sa Children’s Legal Bureau sama nilang Jenny Vieve Cabradilla ug King Anthony Perez. Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]