Diputado: Kinsay gipasabot sa wali sa Obispo?

KASAGARAN mahitabo, di gyod mag-apil-apil ang mga kaparian sa kalihokan sa lokal nga pangagamhan.

Labi na gyod ang mga obispo.

Bisan pa kon ganahan unta sila moyawyaw sa ilang mga hunahuna, molikay gyod na sila.

Dunay gitawag sa Philippine Constitution nga separation of church and state. Mao kana ang ilang giya sa pagtak-om na lang sa ilang baba, labi na kon bahin sa pamolitika.

* * *

Apan adunay obispo nga wala na gyod makaagwanta sa iyang gibati.

Samtang nagyawyaw sa iyang homily, gilakbitan sa pagsulti sa obispo ang mga kahiwian sa usa ka dakong politiko.

Gibanatan og batikos sa Obispo ang gihimo nga pagkolekta og “tongpats” sa maong dakong politiko sa mga supplier ug mga contractor.

Sa mga nakadungog sa maong homily, dili makaon sa iro ang mga batikos sa obispo.

Ingon ana kabug-at ang gibati sa obispo sa gihimo sa maong dakong politiko.

Duna lay problema nga gamay.

Wala hinganli sa obispo ang maong opisyal. Wala sab hinganli ang lugar o posisyon nga gihuptan sa maong dakong politiko. Susama sa “blind item” ang maong batikos.

* * *

Unsay hinungdan nga nag-apil-apil man ang maong obispo sa pangurakot sa maong dakong opisyal?

Ang obispo lang ang makatubag niini. Apan makahimo kita og mga obserbasyon.

Una, di na gyod seguro matulon sa obispo ang gihimo sa maong politiiko maong midagayday gyod ang iyang batikos.

Ikaduha, dunay misulti sa obispo sa maong panghitabo nga kompleto sa mga detalye maoy hinungdan nga nakatuo gyod ang Obispo nga tinuod kini. Mao usab kini ang rason nga nakahunahuna ang obispo nga ibutyag niya ang tanan aron mahibaw-an sa mga katawhan nga aduna na siyay kasayoran sa maong panghitabo.

Ikatulo, gibutyag sa obispo ang gihimo nga pangurakot apan wala niya ibutyag ang naghimo niini. Mahimo nga gusto lang undangon sa obispo ang maot nga gibuhat sa maong opisyal ug gihatagan niya og kahigayonan nga putlon kini sa maong opisyal.

Ikaupat, walay bisan kinsa nga maka-question sa pagkatawo sa obispo, ug walay tawo nga makasulti nga namolitika lang ang obispo. Bug-at ug undanon kaayo ang gihimo sa obispo maoy hinungdan nga hangtod karong mga panahona, padayon pa gihapon ang diskusyon sa maong homily.

Kay wala hinganli sa obispo, mahimutang nga bisan kinsa na lang ang “naigo” sa giwali sa obispo. Maapil ba ang mga mayor sa gitawag og “dakong opisyal?” Maapil ba ang mga kapitan sa barangay?

* * *

Sa mga gidudahan sa mga katawhan nga maoy gipasabot sa obispo, padayon ang pag-obserbar kon mausob ba ang kinaiya sa maong opisyal.

Kon mokalit lang kini og pangita og paagi nga makig-suod sa maong obispo, nagpasabot lang kini nga husto ang pagduda sa mga tawo. Kon mosugod na kini og simba sa misa sa obispo, o mohatag og mga donasyon para sa mga kalihokan sa obispo, husto sab ang pagduda sa mga katawhan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph