ANG Emergency Operation Center (EOC) sa Cebu City Government nitaho nga nakarehistro og labing ubos nga critical care occupancy rate gikan sa 15 ka mga tambalanan nga nahimutang sa Dakbayan sa Sugbo, Abril 25. Nagpasabot kini nga minus na ang na-admit sa ospital nga pasyenre sa coronavirus disease 2019 (Covid-19). Maayong tilimad-on ug hinaut nga magpadahyon kini nga sitwasyon.
Apan dili kini unang higayon nga nitaho ang EOC sa pag-ubos sa critical care occupancy. Kaniadto namatikdan kini apan nisaka og balik. Busa dako pang alampuonon ang atong kahimtang uban sa pangidahay nga magpadayon ang maayong kalamboan sa pagbatok sa pandemiya.
Si Konsehal Joel Garganera, deputy chief sa EOC, nibutyag ning ulahi nga ang 15 ka private hospitals ug public hospitals nitala nalang og 23.1% occupancy rate diin ang 937 bed capacity sa Covid-19 patients, 216 ra ang nagamit ug bakante pa ang 721 ka Covid beds. Ang konsehal nihulagway niini nga “all time low” ang occupancy rate sa hospital facilities sa Cebu City sukad sa Enero 2021.
Niadtong Abril 25, Dominggo, adunay 46 ka bag-ong kaso samtang 62 ang bag-o sab nga nangaayo human sa ilang gihimo nga pagpatambal ug pag-quarantine.
Ang Cebu City adunay total nga 699 active cases gikan niadtong Abril 15 hangtod Abril 24. Ang Guadalupe nga kanhi mag three digits, karon 44 na lang ang ilang aktibong kaso sa nilabay nga 10 ka adlaw.
Magmalampuson ang pagpakigbatok sa pandemiya pinaagi sa hugot nga kooperasyon sa katawhan labina sa pagtuman sa minimum health standard. Mas gikinahanglan kini karon nga miluag na ang kuwarentina ug miabli na ang halos tanang negosyo.
Ekonomiya nituyok na. Libre na ang mga tawo sa paglalakaw sumala sa ilang gusto.
Manghinaut kita nga mapadayon kini sa bag-ong normal.