USA ka mekaniko nakuhaan og kapin sa P500,000 nga shabu sa buy-bust sa alas 9:30 sa buntag niadtong Martes, Abril 27, 2021 sa Sitio Upper, Brgy. Media Once, Dakbayan sa Toledo.
Si Mark Rogernor Genon Adlawan, 36, minyo ug mekaniko, nasikop human sa pipila ka semana nga pag-monitor sa kapulisan.
Si Police Lt. Junnel Caadlawon, hepe sa Toledo Police Station nga nahinabi sa Superbalita Cebu, nagkanayon nga si Adlawan dunay mga kontak sa mga durugista sa Dakbayan sa Sugbu. Gibutyag ni Caadlawon nga plantalya lang ang pagkamekaniko.
Dunay tawo nga mosugo sab niini sa transactions sa gidiling drugas.
Nakuhaan og 8 ka gamayng putos sa shabu, lakip niini ang usa ka putos nga balor og P500.
Nakuhaan sab kini sa 10 ka medium size nga putos sa shabu, P1,120.00 cash, digital weighing scale ug usa ka motorsiklo.
Ang drugas mitimbang sa 75 gramos og ang Dangerous Drugs Board (DDB) value nga P510,000. (GPL)