KIDAPAWAN CITY -- Anaa karon sa preventive suspension ang technician sa Cotabato Electric Cooperative (Cotelco) kinsa giingong gidagit sa mga armadong grupo sa Arakan niadtong Pebrero 2021.
Matud ni Cotelco General Manager Engineer Godofredo Homez nga ilang gisuspende si Kier Selebio gumikan sa dili tin-aw nga paggasto sa salapi sa kooperatiba.
Gidugang ni Homez nga sa wala pa mahitabo ang giingogn pagdagit kang Selebio dunay mga "unremitted collection" siya sa Cotelco.
Niadtong adlaw nga siya gidagit sa giingong New People's Army (NPA), mao kadtong adlawa nga gitakdang i-audit si Selebio sa kooperatiba taliwala sa ilang pahimangno nga di una siya molakaw padulong sa Arakan.
Gisalig na sa kooperatiba ngadto sa mga pulis kung unsa ang ilang hukom sa gihimo nilang imbestigasyon.
Kahinumdoman nga gibalita nga gidagit si Selebio sa mga armadong grupo samtang pauli na unta gikan nagtaod og solar panel sa Barangay Kabalantian, Arakan niadtong Pebrero.
Pipila ka adlaw human siya gidagit, giingong nakaipsot si Selebio didto sa Don Carlos, Bukidnon.
Apan gipamugos ni Selebio nga gidagit siya ug wala sab siya nagwaldas og salapi sa kooperatiba. (Edgar E. Fuerzas)