USA sa mga rason nganong mosikat ang kanta tungod sa iyang title. Pinagsa ra ka kakita og sikat nga kanta nga ang title wala sa lyrics sanglit mao ni magdag recall. Ang pagpili og title sa kanta usahay maoy pinakalisud nga trabaho sa songwriter. Unsa ning mga kantaha nga ang title wala sa lyrics apan grabe gihapon kasikat? Unsay mga naglimin niining tanghaga? Inyo ning mahibaw-an karon sa Ssssuper Ka!
New York Mining Disaster 1941 (Bee Gees)
Mao ni unang international single sa British-Australian pop group nga Bee Gees niadtong Abril 14, 1967. Ang maong awit bahin sa minero nga napiit atol sa usa ka mining accident. Apan base sa songfacts.com nga mugna ra ni sa magsuong Barry ug Robin Gibb ug dili tinuod nga hitabo.
Superstar (The Carpenters)
“Groupie” ang orihinal title niini nga gi-compose ug unang gi-release sa “Delaney & Bonnie” niadtong 1969. Mao ni pag-uso niadto sa pulong “groupie,” ang slang word sa mga “fan” sa banda. Gihatagan ni og bag-ong areglo ni Richard Carpenter ug gihimong “Superstar” ang title nga nahimong biggest hit sa The Carpenters niadtong 1971.
Bohemian Rhapsody (Queen)
Dunay mga niingon nga dinhi gikumpisal ni Freddie Mercury nga bading siya ug ang gipasabot sa linyang “mama I just killed a man” mao ang iyang kanhi imahe nga lalaki nga iya nang gipatay. Si Mercury namatay niadtong November 1991 apan wa gyuy nasayod kon unsay meaning sa iyang kanta nga iyang gi-compose gikan 1969 hangtod 1975.
A Day in the Life (The Beatles)
Usa ni sa mga greatest collaboration nilang John Lennon ug Paul McCartney niadtong Enero 1967 nga inspired sa newspaper article nga nagbalita sa kamatayon sa ilang higalang si Tara Browne tungod sa car accident niadtong December 1966. Mao nang ang opening line sa ilang kanta: “I read the news today oh boy...”
Annie’s Song (John Denver)
Gi-compose ni John Denver alang sa iyang unang asawang si Annie Martell human sa dako nilang away. Nahimo ning No. 1 song sa Amerika niadtong 1974. Apan pag-1982 nipauli ra gihapon sa diborsiyo ang ilang kaminyuon.
Song For You (Chicago)
Gi-compose ni nilang David Foster ug Peter Cetera nga para unta ni Kenny Rogers. Apan tungod kay wala gi-record ni Rogers hinungdan nga giapil na lang sa album sa Chicago niadtong 1980 nga mao ray naglahi kon itandi sa ubang hits sa Chicago nga kargado sa horn.
Unchained Melody (The Righteous Brothers)
Theme song ni sa pelikulang “Unchained” niadtong Enero 1955 diin gikuha usab ang maong title. Usa ni sa most recorded songs sa kasaysayan sa recording diin lakip sa pinakasikat ang version sa The Righteous Brothers niadtong 1965. Naapil usab ni sa soundtrack sa pelikulang “Ghost” pag-1990.
The Lazy Song (Bruno Mars)
Namugna ni Bruno Mars ni samtang nagpalabay sa iyang oras sa recording studio kauban ang mga higala niyang songwriter nga puros usab gibatig kalaay. Ila ning gi-produce ubos sa alias nga The Smeezingtons nga nag-No. 4 sa US Billboard Hot 100 niadtong 2011.
Danny’s Song (Kenny Loggins)
Gi-compose ning Kenny Loggins alang sa iyang maguwang nga si Dan. Sagad sa mga linya niini gikan sa suwat ni Dan ngadto kang Kenny human nanganak ang uyab ni Dan sa una nilang liwat. Wala silay kuwarta niadtong higayona apan puno sila sa paglaum ug mga damgo. Ang “Danny’s Song” unang gi-record ni Loggins niadtong 1970 apan mas nisikat ang version nila sa “Loggins and Messina.”
Simply Jessie (Rex Smith)
Na-release isip ikaduhang single sa third studio album ni Rex Smith niadtong 1979 ug nahimong theme song sa TV show nga “Simply Jessie” usab ang title nga gibituonan ni Rex Smith ug Denise Miller.
Exodus Song (Pat Boone)
Gikan sa musical score sa 1960 film nga Exodus nga naghubit sa nasud nga Israel. Human gipagawas sa mga sinehan gihimoan ni og lyrics ni Pat Boone nga giulohan og “The Exodus Song” (The Land is Mine) nga giisip sa 86-anyos nga legendary singer nga “second Jewish national anthem.”
Weekend in New England (Barry Manilow)
Gi-compose ni Randy Edelman nga bahin sa lalaki nga gibatig kaibog sa babaye nga iyang nahimamat sa New England ug naghandom nga unta magkita pa sila.