DEAR Noy Kulas,
Magpatambag ko sa akong problema parte sa akong asawa nga grabe ka maldita ug di magpabadlong.
Sa di pa mi minyo, ako na siyang gisaaran nga paundangon sa iyang trabaho kon makaanak na mi aron mag-atiman ra siya sa bata. Ako ning nabuhat kay makaya ra nako ang pag support sa among pamilya. Bisan na sa nakaanak na mi og duha. Gawas sa akong work, nag sideline pud ko og buy and sell so, kaya kaayo nako ang pagbuhi nila.
Ang akong problema karon kay kon weekend nga wa unta koy work, molaag pud siya kuyog sa iyang mga barkada. Instead magka bonding mi, di na hinuon. Kami ra sa mga bata naa sa balay. Kon ako siyang pangutan-on, masuko na man hinuon. Magkaaway pa mi.
Karon, ang lain na sab niyang bisyo ang tong-its. Nakuwayan na ko aning iyang bisyo, Unsa kahay maayo nakong buhaton?
Fred
***
Fred,
Basin gilaay na ang imong asawa sa iya lang pagka housewife. Mas mayo pang imo na siyang pabalikon og trabaho, labina online, aron siya malingaw. Kana kay nag-ingon ana siya, nangita na siya og kalingawan. Di baya lalim mag-atiman sa mga anak ug balay, apil na ang pagbuhat sa mga gimbuhaton sa panimalay.
Unya instead naa ra mo sa balay, pag schedule og mga bakasyon ug laag. Di kay puro na lang sab negusyo sa weekend ang imong atubangon. Mas maayo gani pud imo siyang i-involve sa imong negusyo aron siya ma busy ug dunay diversion.
Daghan sa mga magtiayon, labina sa mga bana, nga makalimot sa ilang responsibilidad ngadto sa ilang asawa. Sud sa kaminyuon, kinahanglan magpabilin nga lovers ang magtiayon.
Noy Kulas
rojval69@yahoo.com ug kulassuper@sunstar.com.ph