NAGLABI sa mga Pilipino ang nagduha-duha nga magpabakuna batok sa Covid-19. Sa survey sa Pulse Asia gikan sa Pebrero ngadto Marso ning tuiga, 61 porsyento sa mga respondent nitubag og “no” sa pangutana kon magpabakuna ba sila. Sa ato pa, 39 porsyento ray gustong magpabakuna.
Mao ni vaccine hesitancy. Naa pa ang kahadlok sa mga tawo sa injection. Sama sa babaye’ng mihangyo sa doktor nga sa lubot lang siya magpa-injection kay mahadlok siyang makakita sa dagum. Sa pag-injection na gyud, nireklamo ang babaye, “Dok, di na man na lubot, Dok.” Tubag sa doktor, “Sigi lang. Di na man sab ni injection.”
Aron makab-ot ang herd immunity, kinahanglang mabakunahan ang mayoriya sa katawhan. Tungod niini, gipasaka ang usa ka balaudnon sa House of Representatives niadtong Lunes, Abril 26, nga maghimong mandatory sa pagbakuna batok sa Covid-19.
Ang House Bill No. 9252, ang giproponer nga Covid-19 Vaccination Program Act of 2021, magmando sa usa ka “science-and evidence-based” nga pagbakuna subay sa lagda sa Department of Health (DOH).
Si Cavite 4th District Rep. Elpidio Barzaga Jr., ang niduso sa maong balaudnon, niingon, “the State is mandated to make rules and regulations to protect the lives of the majority of its citizens.” Bakunahan ang kadaghanan. Apan exempted kadtong mga tawo nga dunay “medical conditions” subay sa sertipikasyon sa ilang doktor.
Apan si Health Undersecretary Maria Rosario Vergeire niingon nga gibarugan sa DOH ang rekomendasyon sa mga eksperto nga ang mga tawo adunay katungod sa pagpili kon magpabakuna o dili. Mao sab kini ang baruganan sa World Health Organization ug sa Strategic Advisory Group of Experts on Immunization nga boluntaryo ang pagbakuna.
Matod niya, ang mga bakuna batok sa Covid-19 anaa pa sa developmental stage, busa di pa mapugos ang mga tawo nga magpabakuna. Ang gisaligan sa DOH sa pagbakuna mao nga mas dako ang benepisyo sa bakuna kay sa risgo niini.
Hangtod sa Abril 25, ang Pilipinas adunay konpirmadong 997,523 ka mga kaso sa Covid-19, lakip sa 77,075 ka mga aktibong kaso, 903,665 nga nangaayo ug 16,783 nga nangamatay. Nikabat na og usa ka milyon ka mga Pilipino ang nabakunahan batok sa Covid-19. Giuna ang mga healthcare workers, mga senior citizens ug kadtong dunay mga comorbidities o dunay mga balatian.
Samtang si Presidential Spokesperson Harry Roque niingon nga bisan kon ang estado adunay gahom nga pabakunahan ang katawhan sa Covid-19, di pa kinahanglan nga himuong mandatory ang pagbakuna kay ubos pa kaayo ang supply sa bakuna, Gihuwat pa, matod ni Roque, nga moabot ang bulto sa mga bakuna.
Sakto sab, himuong mandatory ang pagbakuna, unya wa pay bakuna. Gani si Cebu City Mayor Edgardo Labella nihangyo ni Carlito Galvez Jr., ang national vaccine czar, nga tugotan nga mopalit ang Siyudad og bakuna kay nahurot na ang gihatag sa nasudnong kagamhanan. Mao kini ang hinungdan nga nahunong ang pagbakuna sa mga senior citizens. (edbarrita@gmail.com)