GIPANAWAGAN ni negosyanteng Ramon S. Ang iyang kaubananang negosyante nga dili gyud angay silang mag-apil-apil sa eleksiyon sa nasud isip kandidato sa pagka-presidente o mohatag og financial support sa mga pulitiko. Neutral ra gyud kuno sila. Daghan man god ning nag-awhag ni Ang nga modagan sa pagka-presidente sa nasud sa sunod tuig nga election. Si Ang maoy mipuli ni Danding Cojuangco isip presidente ug chairman sa San Miguel Corporation.
Unsa? Dili mag-apil-apil ang mga negosyante sa eleksiyon bisan sa pagsuporta og mga kandidato? Aber, kinsa man ang numero unong campaign fund contributors panahon sa eleksiyon? Ang mga negosyante. Asa man god og kuwarta ning mga pulitiko. Aw, naay kuwarta pero dili igo alang sa kampaniya labi pa kon modagan ka og usa ka national position.
Pulitika negosyo
Ang eleksiyon sa Pilipinas usa ka dakong negosyo. Ang mga politiko nga magpapili mag-contest sa pagpa-manok-manok sa mga adunahang magpapatigayon. Kay kon modagan ka sa eleksiyon nga walay kuwarta, dulom pa sa ngitngit ang imong padulngan. Apan usahay inig latad sa mga kandidato ingon og sa maglisod ang kadaghanan sa pagpili sa pustahan nilang manok.
Kon mahitabo kini kanimo, hinundumi lang ang usa ka panultihon nga nagkanayon; “When a character of a man is not clear to you, look at his friends.” Mao kini tambag ni Sun Tzu, Chinese nga nagsuwat sa libro nga “The Art of War.” Kay anha man diha makita ang matang sa kandidato nga gipaluyuhan sa mga kuwartahang negosyante.
Dako’g kapuslanan kining maong tambag kay sum-ol na kaayong paminawon ang pipila ka mga negosyante nga moingon nga lonlon public service ra ilang gihimo ug nga walay gilabanan o gisuportaha nga kandidato matag eleksiyon. Kining linyaha nagpasabot nga gibuguan sila sa mga tawo nga ilang padunggon sa pag-ulo-ulo.
Wa lang sab sila masayod nga sa kahiladman sa mga tawo nga ilang gipabati niini may tingog nga nagpaninggit og “estoryaheeee!” “Wala mi matawo gahapon. Dili na mi madala sa inyong mga atik. Tuntuha inyong lolong upaw, ayaw mi.” (bobbygnalzaro@gmail.com)