Editoryal: Nainsulto

Editoryal: Nainsulto

DUNAY mga Sugboanon nga nasagmuyo sa pamahayag ni Senador Bong Go kalabot ni Lapulapu. Duna kunoy pagtuon nga nagsubay sa kagikan ni Lapulapu, kinsa giingong gikan sa Sulu. Gisugo kuno si Lapulapu sa sultan sa paglibot sa mga isla nga iyang ginsakpan, apil na ang Mactan, kon nganong dunay mga langyaw nga nangabot.

Tinuod, wa kaayoy record kalabot sa kinabuhi ni Lapulapu. Ang labing klarong tinubdan mao lang ang sinuwat ni Antonio Pigafetta, nagsuwat sa biyahe ni Portuguese explorer Ferdinand Magellan. Lahi sa ubang mga bayani, pangitaon kaayo ang estorya sa kinabuhi ni Lapulapu.

Kon basehan ang mga nasuwat sa kasaysayan, lider sa Mactan si Lapulapu. Di siya usa ka ulipon sa sultan sa Sulu. Mao ni ang nasawayan sa ubang mga Sugboanon kay kon ingnon nga gisugo lang siya sa sultan, mahug rang lider ra sa mga manggugubat si Lapulapu.

Apan kon tan-awon ang gisuwat ni Pigafetta, lider sa Mactan si Lapulapu nga wa ikasinabot ug moyukbo kang Rajah Humabon, lider sa Sugbo niadtong higayuna. Duna silay pulitikanhong kasungian.

Di respetuhan si Lapulapu sa mga tawo sa dapit kon usa lang siya ka ordinaryong manggugubat, bisan pag lider sa mga manggubat nga gikan sa Sulu. Matod sa ubang local historian, si Lapulapu andam moila sa hari sa Espanya, di kang Humabon.

Nalain ang ubang mga Sugboanon, labina ang mga Oponganon sa pamahayag ni Senador Go kalabot sa paghimo ni Lapulapu nga suluguon lang sa sultan sa Sulu. Sa ilang nahibaw-an, si Lapulapu lider sa mga Oponganon nga dunay ranggo nga datu. Kini nagpasabot nga ang unang bayani sa Pilipinas dunay hamiling dugo ug kagikan.

Nganong usbon pa man kon unsa ang pagkatawo ni Lapulapu? Alang sa mga Sugboanon, si Lapulapu dunay hamili nga dugo, Tausug man siya o di. Ang paghimo niyang suluguon lang insulto sa mga kaliwat ni Lapulapu.

Related Stories

No stories found.
SunStar Publishing Inc.
www.sunstar.com.ph