KAPULISAN sa Siyudad sa Sugbo mohimo og barangayanihan community pantry dungan sa 11 ka mga police station sa Cebu City Police Office (CCPO) aron tabangan kadtong mga kabus nga labing naapektohan sa coronavirus disease (Covid-19).
Si Police Lieutenant Colonel Wilbert Parilla, deputy city director for operation sa CCPO, nagkanayon nga nahunahunaan kini ni Police Colonel Josefino Ligan, direktor sa CCPO, nga sundogon ang misikat na nga community pantry nga gihimo karon.
Dungan matod pa kini nga himuon sa 11 ka police stations diin ang mga gikinahanglan nga pagkaon sa matag adlaw ang ilang ipanghatag sama sa itlog, bugas, delata, utanon ug uban pa nga sarang mapahimuslan sa katawhan.
Dugang ni Parilla nga aron mapatuman ang minimum health standard aduna silay ipang apud-apod nga kupon diin kadtong labing kabus nga nanginahanglan ang ilang hatagan niini.
Gimandoan ni Ligan ang station commanders nga makig-alayon sa mga barangay officials nga sakop sa ilang hurisdiksyon aron ilhon kadtong mga kabus nga namuyo sa ilang lugar nga maoy hatagan sa kupon.
Mag-amot usab ang mga personnel sa CCPO aron ipamalit sa mga utanon ug mga delata samtang wala pa maabot ang ihinabang sa mga arangan ang kinabuhi.
Panawagan sa CCPO ngadto sa mga arangan ang kahimtang nga modonar sigun sa ilang mahimo aron makatabang sa mga nanginahanglan nga mga Sugboanon.
Abli usab sila sa pagdawat sa mga donasyon gikan sa mga politiko basta dili lang ipamulitika ang ilang gihatag nga pagkaon sa mga Sugboanon.
Giklaro ni Parilla nga nag-amping sila sa pagdawat sa ihatag nga donasyon nga dili kini masagulan gikan sa sama sa mga durugista aron lang makakuha og proteksyon gikan kanila. (AYB)