SA LABING unang higayon, nakab-ot sa Cebu City Government ang duha ka adlaw nga ubos sa 5 porsyento nga positivity rate sa mga gipailawom sa swab test sa coronavirus disease 2019 (Covid)-19.
Base sa resulta gikan sa Cebu City Emergency Operations Center (EOC), ang dakbayan adunay 3.81 porsyento nga positivity rate niadtong Abril 26 ug 4.38 porsyento nga positivity rate niadtong Abril 27.
Ang positivity rate nagpasabot sa gidaghanon sa nagpositibo sa Covid-19 base sa gidaghanon usab sa gipailawom sa swab test.
Sulod sa duha ka mga adlaw, sa kinatibuk-an adunay 1, 398 ka mga individual ang gikuhaan og sample alang sa Covid-19 testing.
Si Konsehal Joel Garganera, deputy chief implementer sa EOC, niingon nga maayong tilimad-on ang pagkunhod na sa kaso sanglit pasado na kini sa World Health Organization (WHO) standard.
Apan ang konsehal nagkanayon nga bisan kon nag-anam na og ubos ang mga kaso, dili gihapon angay mokumpyansa sanglit anaa pa gihapon ang presensiya sa Sars-CoV-2, kagaw nga nagdala sa Covid-19.
Sa Abril 27 nga talaan sa Department of Health (DOH) 7, ang Siyudad sa Sugbo dunay 44 ka bag-ong mga kaso sa Covid-19. Kini nihatod ngadto sa 810 ka aktibong mga kaso sa siyudad.
Duna say natala nga 68 recoveries kun nangaayo sa sakit sa samang adlaw.
Sa kinatibuk-an, niabot na og 21,560 ka mga kaso sa Covid-19 sa dakbayan, 832 ang nangamatay. (PAC)