KADTONG mga driver nga nangaanad sa pag-park sa ilang sakyanan sa mga bike lane sa Dakbayan sa Sugbo di na makalusot sa bisan unsang oras, angay nang magbantay.
Karong Mayo, magsugod na sa pagpanakop ang Bike Patrol deputies nga giumol sa Sugbo Bike Lanes Board. Ang deputies padayong nagpailawom og training sa traffic signs, laws ug uban pa alang sa pagpatakap na kanila sunod buwan. Ang nibansay kanila mao ang CCTO.
Matod ni manlalaban Gerry Carillo, chairman sa board, nga duna silay gibansay nga unang 30 nga first batch sa deputies kun enforcers. Sa kinatibuk-an, 60 ka enforcers ang ilang ipakatap sa kadalanan nga ang lunlon trabaho mao ang pagbantay sa bike lanes aron di kini maabusohan.
Si Carillo niingon nga makaisyu og citation tickets ang deputies, makapa-tow og sakyanan ug motorsiklo nga gi-park sa lanes ug makadumala sab og trapiko kon gikinahanglan.
Sa interbyu sa Superbalita Cebu, si Carillo nibutyag nga si Konsehal Raymond Alvin Garcia nipahibawo kaniya nga naaprobahan sa Konseho ang dugang P20 million nga budget nga gipangayo sa board.
Ang P20 million idugang sa pagpamalit og plastic bollards alang sa bike lanes kay ang gibutangan sa Department of Public Works and Highways (DPHW) mao lang ang main roads kun highways, wa ang secondary roads.
Nalakip sa mao nga budget ang sweldo sa mga deputy nga umulon sa bike board, matod ni Carillo.
Ang 60-man deputies pangulohan ni retired Colonel Ranulfo Sebusa, dugang niya.
Ang deputies kun enforcers magbiseklita sa ilang pagpatrolya, busa ang ilang gipanawat kadto lang dunay kaugalingong biseklita ug kahibawo og bike handling.
Boluntaryo
Iya usab nga gibutyag nga ang Alpha Kappa Rho (Akrho) nipadayag sa ilang kaikag sa pagbutang og volunteer enforcers isip force multipliers.
Duna pay ubang bike organizations nga nipadayag sa ilang interest sa pagpatuman sa bike lane ordinance nga gikalipay ni Carillo.
Ning paagiha, matod niya nga mangahadlok na ang mga driver sa pagpataka og park sa bike lanes kay duna na may dedicated nga enforcers nga awtorisado sa pagdakop.
Tinuod nga sa pagkakaron nanakop ang mga traffic enforcer sa Cebu City Transportation Office (CCTO), apan di tanang lugar mapatrolyahan kay nagdumala usab sila og trapiko.
Mao kini ang nagtukmod sa board sa pag-umol og kaugalingong enforcers nga makatutok sa pagpatuman sa ordinansa.
Ang board giumol ni Mayor Edgardo Labella aron dumalahon ang bike lanes sa dakbayan base sa Tindak Sugbo Bike Lanes Ordinance nga napasar niadtong 2014 sa administrasyon ni kanhi mayor karon Bise Mayor Michael Rama. (REV)