MACO, Davao de Oro -- Moabot sa P2,757,000 nga cash ang gitunol ngadto sa 44 ka kanhi rebeldeng benepisyaryo gikan sa nagkadaiyang munisipalidad sa probinsiya pinaagi sa Enhanced Comprehensive Local Integration Program (E-Vlip) niadtong Miyerkules, Abril 28, 2021.
Ang maong kantidad (tseke) gitunol mismo sa representante ni Governor Jayvee Tyron Uy nga si Hon. Macario T. Humol, boardmember sa Davao de Oro, nga giabagan nila Brigadier General Luis Rex Bergante, commander sa brigade nga naglihok sa maong probinsiya, ug ni Noel C. Duarte, provincial director sa Department Interior and Local Government (DILG), ngadto sa mga benepisyaryo sa gihimong seremonya didto sa Sanitary Function Hall sa lungsod Nabunturan.
Gikalipay og dako sa mga benepisyaryong kanhi rebelde, apil na ang ilang mga pamilya nga mitambong sa maong higayon ang nadawat nilang salapi.
Gibutyag ni Duarte ngadto sa mga kanhi rebelde, "Ang tabang sa gobyerno dili lang tanan sa P65,000, aduna pay daghang programa alang kaninyo nga mga surenderees. Duol lang mo sa inyong mga kasundalohan sa inyong lugar aron matabangan mo sa uban pang mga livelihood..."
Gitin-aw sab ni Humol nga ang kalinaw ug kahapsay maoy prayoridad sa probinsiya.
Samtang gitimbaya sab ni Bergante ang mga benepisyaryo tungod sa paghimo og maayong desisyon sa pagbalik sa sabakan sa balaod.
"Your Army here in Davao de Oro who continuously endeavours for Peace assures your safety, not only physically but also psychologically. We understand that you were just deceived and became slaves of the wrong ideologies injected to you by your recruiters," sama pa niya.
Samtang nanawagan sab ang opisyal ngadto sa uban pang mga rebelde nga motahan na sa ilang mga armas ug mobalik sa sabakan sa balaod samtang duna pay igong panahon.
Si Isidro labonite, Jr., usa sa mga benepisyaryo, nagpadayag sa iyang dakong pasalamat ngadto sa gobyerno.
"Sa akong pag-surrender, giampingan ko sa 25IB ug nausab gyud ang akong kinabuhi. Maayo ang gobyerno – lahi ra kaayo sa gina-propaganda sa mga NPA kanamo..." tipik sa pahayag ni Labonite.
Una sa pagtunol sa ilang benepisyo, ang mga nahisgutang mga kanhi rebelde mipailawom og hagip-ot nga proseso sa balidasyon aron nga madeterminar ang ilang pagkatinuod. Human sa balidasyon, mipailawom na sab sila og de-radicalization process, nga nag-andam kanila alang sa pagbalik niini ngadto sa katilingban.
Ang gitunol nga kantidad naglangkob sa inisyal nga tabang pinansiyal nga P15,000, P50,000 alang sa tabang panginabuhian ug bayad isip bugti sa mga armas nga gitahan. (WGM/1001st IB, 10ID, PA)