AWAY sa magtiayon ang alegasyong nag-unang hinungdan sa kalayo nga miresulta sa pagkasunog sa 202 ka mga barong-barong nga kabalayan, Miyerkules sa gabii, Abril 28, 2021, sa Block 8 ug Block 9, Muslim Village, Barangay Ilang, Davao City.
Sa inisyal nga report sa Davao City Police Office (DCPO), nasayran nga hubog nga miuli ang usa ka Joseph (bansagon gitago), diin nag-away sila sa iyang misis nga si Alicia, 49-anyos.
Sa kapungot sa bana, mikuha kini'g gasolina ug iyang gisabyag sa ilang balay dayon gisindihan.
Gilayong miulbo ang kalayo ug daling mikanit sa kabalayan sa dapit sanglit gama sa mga light materials.
Sumala ni Bureau of Fire Protection (BFP) Davao City Fire District, Investigation Division, Chief, Senior Fire Officer (SFO) 4 Ramil E. Gillado nga miabot sa ikatulong-alarma ang pagpalong sa kalayo nga nagsugod pasado alas 9 sa gabii ug na-fire under control mga pasado alas 11 na sa gabii.
Subay sa inisyal nga datus sa Panacan Fire Station, dunay mokabat kapin kun kulang P2 milyones ang danyos sa hitabo.
Atol sa hitabo, patay sab ang usa ka 56-anyos nga lalaki human mabanggai og trailer truck sa pagdagan niini patabok sa kalsada atol sa sunog.
Gawas sa naligsan, wala na sa’y gikatala nga na-trap sa maong sunog.
Gi-validate na sa City Social Welfare and Development Office (CSWDO) sa Davao City ang mga pangalan sa nasunogan aron sa hinanaling panahon, madunol dayon ang hinabang pinansiyal.
Sumala ni Gillado nga usa sa dakong kontribusyon nga matigayon ang sunog mao ang electrical faulty-wiring.
"Matag karon ug unya nagpahimangno gyod ta sa katawhan nga mag-amping sa mga wiring sa panimalay, kung dugay na, kinahanglan ilisdan na gyud ug subayon pirmi basin og nagisi pinaagi sa pagkitkit sa mananap o sa bisan unsa nga rason, himuon ta kini aron malikay sa sunog," ingon ni Gillado.
Sa talaan sa BFP-Davao City Fire District, Investigation Division, duna nay mokabat 39 ka mga natigayong sunog gikan Abril 1-28, 2021 nga dunay danyos nga mokabat sa kapin kun kulang P10,539,500.