Daku na kaayo og kalainan ang pagsaulog sa Kadaugan sa Mactan karong tuiga itandi sa milabay nga katuigan sa wala pa ang Chan administration. Bongga kaayo ang maong kasaulogan kaniadto tungod man gud sab hinuon kay wa pa man kadtoy Covid–19.
Hisgutan ko kini kay ako ang naghangyo kang anhing konsehal Damian Gomez nga tukorun ang Lapu-Lapu City Tourism, Cultural and Historical Affairs Commission nga mibuhi sa giundang na untang Battle of Mactan.
Dugay nga giplanuhan ang pagpahigayon sa unang Kadaugan nga among gipadirihi-an ni Al Evangelio. Gawas sa re-enactment nga gihimo sa baybayon sa Mactan, diha pay presentation niini sa SM cinema. Daghan nang mga actor ug actress ang nakadala sa papel ni LapuLapu, Bulakna ug Magellan. Nadala na usab ni karon Senador Manny Pacquiao ang papel ni LapuLapu nga libre niadtong panahon ni Mayor Boy Radaza, higala ni Pacman.
Ubos sa administrasyon ni Mayor Paz Radaza, kaming tourism commissioners nipasiugda usab sa food festival diin ang pagkaon sa mga mahalong hotel sa Lapu-Lapu mapalit sa barato nga presyo.
Gihimo usab ang Rampada kun rampa sa karsada diin dihay mga kalingawan nga sama sa gihimo sa Brazil. Dinhi na-promote usab ang brand nga “Historic Resort City” nga mao ang Lapu-Lapu City.
Karon, dili lamang nga inato na kaayo ang kasaulogan, diyutay pa gayud kaayo ang mga tawo nga makalantaw sa presentasyon, dili lamang tungod sa health protocol, kundili tungod usab kay dihay mga inilang opisyal sa gobiyerno nga nitambong. Misamot unta kadto ka istrikto kon nahinayon pa pagtambong si Presidente Rodrigo Duterte.
Nahibung ako nganong aduna na may gihimong detailed engineering design (DED) nga gihimo alang kuno sa duha ka mga flyover ug underpass sa Cebu City. Ang naandan niini nga kon adunay mga proyekto nga buot ipatuman sa usa ka dapit, kinahanglang i-indosar kini sa development council sa maong dapit. Kadaghanan, kon dili hapit tanang proyekto pasi-ugdahan sa mayor o sa kongresista sa maong dapit. Nganong wa may kasayuran si Mayor Edgardo Labella niining maong proyekto nga gihimuan na og DED? Nagduda ang katawhan nga gihimo kini niadtong naghinapus na ang 2019 kay aron magasto gayud ang nahabiling salapi sa Department of Public Works and Highways (DPWH) kay tingalig ma-revert kini sa general fund. Murag dunay buot ipasabut ang mga nagduda niining pag-release sa kapin sa P1 million niining panahon sa pandemic. (msr1144@yahoo.com)