Gibutyag ni Cebu City Police Office (CCPO) Director Col. Josefino Ligan nga wala magkatakdo ang empty shells o basiyo sa bala nga nakuha sa crime scene diin pusila patay si Ritchie “Myles” Nepomuceno sa Basak Pardo sa Abril 19, 2021 ug ang armas nga gigamit ni Staff Sergeant Celso Colita sa pagpusil sa iyang kaugalingon sa maong gihapong adlaw. Kini base sa resulta sa ballistic examination nga gipahigayon sa kapulisan kay gidudahan man god nga si Colita maoy nipusil ni Nepomuceno.
Si Nepomuceno maoy mitumbok kang Colita ug laing 10 ka kaubang mga pulis nga kanhi nadestino sa Sawang Calero Police Station og robbery extortion. Gitumbok pa ni Nepomuceno si Colita nga milugos kaniya sa makaduha ka higayon sulod sa motel. Sa adlaw nga gipatay si Miles, base sa logbook sa guard house sa Police Regional Office (PRO 7), si Colita uban kang Corporal Christopher Lorete isip escort, migawas gikan sa PRO 7 camp kay nagpa-medical exam.
Kay wa magkatakdo ang mga basiyo ug armas ni Colita, buot ipasabot nga dili si Colita maoy nagpusil kang Nepomuceno. So, walay ebidensiya nga aduna siyay kalambigitan sa kamatayon ni
Nepomuceno. Way kaso kay wa may ebedensiya. Apan dili gihapon kini makapa-wala sa pagduda nga si Colita adunay kalambigitan. Kay ngano man?
Aduna gihapoy pagduda nga si Colita may kalambigitan sa pagpusil kang Nepomuceno gamit ang laing armas. O ba kaha nagsugo o nagbayad si Colita og gun-for-hire. Si Lorete nga maoy ni-escort kang Colita nisubmiter ba usab kaha sa iyang armas sa ballistic examination? Sila ra bang Colita nagkuyog tibuok adlaw. Hinuon kining mga pagduda di magamit isip ebidensiya sa pagsang-at og kaso. Taghap-taghap ra ning ato.
Sa kaso ni Colita, nag-suicide ba kaha siya? Daghan gihapong mga gumunhap ug tanghaga nga naglimen sa kaso. Walhon si Colita. Apan nganong sa tuo man nga tampihak ang “entry” sa bala sa iyang samad? Nganong wala may “gunpowder burn” o kanang termino nga “tattooing” sa parte sa tampihak nga diin misulod ang bala? So, posibleng gipusil siya nga dili dul-it. Mogawas kaha ang kamatuoran aning mga kaso ni Nepomuceno ug Colita? (bobbygnalzaro@gmail.com)