Nalandig sa tambalanan ang usa ka porter sa Angasil wharf sa Barangay Mactan, Dakbayan sa Lapu-Lapu human kini dunggaba sa iyang kabanay nga tomboy gumikan sa personal nila nga kasungian.
Ang biktima nailang si Frederick Alibong Silawan, 32, ug molupyo sa Angasil, Mactan.
Samtang ang nagdunggab kaniya mao ang iya ra usab kabanay nga si Rosana Alibong Godinez, 41, ug molupyo ra usab sa Angasil.
Nitahan si Godinez sa kapulisan human sa pagpanunggab.
Matod ni Police Major Narciso Abapo hepe sa Mactan Police Station sa Lapu-Lapu City Police Office (LCPO) nga base sa ilang pakisusi posibleng personal ang motibo sa pagpanunggab.
Kini human nga nagpa blotter sa ilang buhatan si Godinez niadtong miaging adlaw gumikan kay kanunay siya nga hagisan ni Silawan kung mahubog sa walay igong rason.
Gani gidunggab na usab siya kaniadto apan giingong wala lang makaduot pag-ayo ang gigamit nga kutsilyo.
Niadtong Abril 28 sa alas 4:00 sa hapon wala na makapugong si Godinez ni Silawan hinungdan nga iya kining gidunggab makaduha ka higayon samtang nagtan-aw og TV.
Human sa pagpanunggab nisakay unta siya og habal-habal aron motahan sa kaugalingon sa kapulisan apan gipakanaog kini sa drayber sa kahadlok nga maamong siya sa krimen.
Ang mga pulis na lang ang nisikop kaniya sa ilang pinuy-anan atol sa hot pursuit operation.
Kasong frustrated murder ang gikatakdang atubangon ni Godinez nga kasamtangan karong gibalhog sa LCPO ug nipadayag nga wala siya magmahay sa iyang nabuhat. / GCM