Sukad gibuksan ang City Hall “pantry at your door step” sa Cebu City Government, niabot na og 2,600 ka mga pamilya ang nakapahimulos gikan sa lima ka barangay sa dakbayan niadtong Lunes, Abril 26,2021.
Kini ang gibutyag ni Market Administrator Irvin Cabales, kinsa maoy nangulo sa programa nga giumol ni Mayor Edgardo Labella ubos sa suporta sa mga manggihatagon nga kahugpongan sa vendors sa
Carbon Public Market ug ubang merkado publiko sa dakbayan.
Lakip sa mga barangay nga nabisita na sa City Hall pantry at your door step mao ang Day-as, Bo. Luz, Bulacao, Sambag II ug Quiot kansang mga benepisyaryo nakapahimulos sa libreng utanon,prutas, lamas, karnes, noodles, sardines ug uban pa.
Niadtong Abril 26 dihang gilusad ang maong programa, gidagsa kini sa daghang mga tawo apan walay problema sa social distancing ug ubang health protocol sanglit hugot kining gipatuman didto sa Plaza Independencia.
“Ka-inspiring gayod nga the community pantry launched by our Market Operations Division (MOD) last week has so far reached Barangays Day-as, Barrio Luz, and Bulacao,” padayag ni Labella sa niaging adlaw.
Ang mayor nagpasalamat ngadto sa mga vendors kinsa nihatag sa ilang mga produkto nga wala mahalin ug kadtong ni-donate og laing mga produkto para mahatag ngadto sa mga tawo nga labaw nga nanginahanglan.
Si Cabales nagkanayon nga magpadayon ang ilang pagpadagan sa City Hall pantry at your doorstep hangtod sa katapusan putos nga mahatag ngadto sa mga tawo.