Nasikop sa entrapment operation sa National Bureau of Investigation (NBI-7) ang giingong illegal recruiter nga si Juvelyn “Ghat” De Los Trico sa foodcourt sa usa ka mall sa Dakbayan sa Sugbo sa Abril 27, 2021.
Si De Los Trico gisumbong sa duha ka mga kaila niini nga nabiktima human gipasaligan nga makatrabaho sa Singapore ug Dubai isip customer care service.
Ang mga biktima giila nga sila si Sheena Mae Faustino ug Maria Monica Abella, pulos hingkod ang pangidaron, taga dakbayan sa Sugbo.
Giiingong modus ni de los Trico mao ang pagpangayo og kwarta sa mga biktima aron may ikaproseso sa mga dokumento, visa ug airfare.
Ang tanyag sa ni de los Trico nga direkta ang pag-hire ug magdawat og sweldo nga P80,000-P90,000 ang mga biktima matag buwan ug may incentives. Libre ang puy-anan, pagkaon, shuttle ug airfare.
Aron maka transact sa mga biktima, naghimo og social media account ang suspek pinaagi sa mga ngalan nga Kyrie Ghat Cruz, Ghat Dela Cruz Delostrico ug Zeke Kyrie nga giingon nga nag tungha sa U-Drive Company.
Asoy ni Faustino nga gipalukat sila sa rekisitos nga naglakip sa passport, medical ug laboratory examinations, marriage certificate, ug uban pa ingon man P30,000-P40,000 nga show money. / ANV