Kon duna kay cash nga ikapalit og four-wheeled ug two-wheeled nga sakyanan, mahimo na kini karon human ang Department of Trade and Industry (DTI) nidili sa dealers sa paggamit sa “installment only.”
Dunay dealers sa mga sakyanan ug motorsiklo nga di magpapalit og cash kay sila gusto og data-data nga ipaagi sa financing.
Mga car ug motorcycle buyer nangreklamo niini ug niabot sa atensyon sa DTI hinungdan sa pagluwat og administrative order.
Ubos sa DTI Administrative Order (DAO) No. 21-03 kun “Guidelines for payments options on the purchase of consumer products and services” nga niepekto sugod niadtong Abril 23, 2021, makapili na ang konsumidor kon mo-cash ba siya o modata-data sa sakyanan.
“The DAO mandates all persons and companies, whether registered or unregistered, engaged in the sale or offer for sale of consumer products and services, to provide consumers the option to pay in cash, in installment, or a combination of the two, whenever they make a purchase,” matod sa DTI order.
Matod sa mando nga ang di pagpabayad sa kustomer og cash isip option sa pagpalit, ipaagi man og debit, credit cards ug uban pang paagi, usa ka kalapasan sa Article 52 sa Consumer Act of the Philippines nga dunay silot.
Bisan kon ipaagi sa debit, credit cards ug uban pang paagi, kinahanglan nga sama ra gihapon ang presyo, dugang sa DAO.
Kon ipaagi sa data-data ang pagpalit, kinahanglan nga di molabaw ang interest rate nga gisunod sa merkado.
Kinahanglan nga ang namaligya mopahibawo sa mopalit sa unsa pay laing mga balayranan.
Ang buyer kinahanglan nga hatagan og kopya sa namaligya sa tanang mga dokumento sa transaksyon.
Kon bawion man ang sakyanan gikan sa buyer, kinahanglan nga ipasubay kini unsay nalatid sa balaud.
NALIPAY
Usa sa mga nalipay sa kamandoan sa DTI mao si Regional Director Victor Caindec sa Land Transportation Office (LTO)7.
Matod ni Caindec nga mapanalipdan ang mga konsumidor gikan sa mapahimuslanong car ug motorcycle dealers.
“I am elated and vindicated to hear of this development . LTO 7 has been at the forefront in the advocacy for stronger protection of consumer rights , especially for motorcycles and vehicle vehicle buyers,” padayag ni Caindec.
Gihulagway sa pangulo sa LTO 7 nga ang direktiba sa DTI nga nahasubay sa findings sa Senate Blue Ribbon Committee ni Senador Richard Gordon nga nagpakita sa mga sayop nga practices sa motorcycle dealers diin nadehado ang mga mamalitay og motorsiklo.
“No longer are ordinary Filipinos held captive by unfair and insensitive “in-house financing” schemes by unscrupulous dealers, but this also allows the entire motor vehicle industry to benefit from a more dynamic market financing landscape,” dugang ni Caindec.
Usa ka motorcycle dealer nga nahimutang sa dalan P. Del Rosario, Dakbayan sa Sugbo, kansang staff di lang magpahingalan, niingon nga dugay ra silang nagpatuman sa maong paagi bisan wala pa ang DAO No. 21-03.
Ang ilang mga mamalitay gitugotan nga maka-cash kon adunay igong kwarta ug installment kon gusto kini og datadata.
Ilawom sa Republic Act No. 7394 kun Consumer Act , ang DTI adunay mandato sa pagpanalipod sa mga konsumidor gikan sa mga di makiangayon ug pamaagi sa pagpamaligya.
Ang mga makalapas sa DAO, mahimong mapriso og lima ka buwan ngadto sa usa ka tuig o pagbayad og P500 ngadto sa P10,000 o ipahamtang ang duha depende sa hukom sa korte.