MACO, Davao de Oro -- Dead on the spot ang mag-amahan human gipamusil sa tulo ka mamumuno didto mismo sa ilang balay alas 7:45 sa gabii, Abril 29, 2021, Huwebes, Purok 1, Concepcion.
Sa report pinaagi sa Police Regional Office (PRO) Davao Region, ang amahan giila nga si Arman Pacaldo Demecillo Sr., samtang ang anak mao si Arman Pasco Demecillo Jr., 26 anyos.
Migula sa imbestigasyon sa kapulisan nga samtang naglingkod gawas sa ilang balay ang mag-amahan, kalit miabot ang tulo ka mamumuno sakay sa motorsiklo kinsa pulos nakasuot og bonnet ug itom nga t-shirt ug naka- pantalon.
Duha sa mga suspek giingong nagdala og M16-Armalite rifle, minaug sa motor dayon gipamusil ang mag-amahan.
Nakadagan pa ang anak padung sa ilang kusina apan namatay gihapon kini.
Di pa ma-establisar sa kapulisan ang motibo sa krimen apan wala gipadaplin ang anggulo nga personal nga bangi diha sa imbestigasyon sa awtoridad.