Binasi sa Buhat 9:26-31; Salmo 22; 1 Juan 3:18-24; Juan 15:1-8
GAHAPON gikonsagra sa atong kaobispohan ang atong nasod ug simbahan ngadto kang Señor San Jose. Lakip kini sa kasaulogan diin giproklamar ni Papa Francisco ang tuig ni San Jose sugod niadtong Disyembre 8, 2020. Nadasig man god kuno ang Santo Papa sa iyang nasaksihan nga sakripisyo sa ordinaryong mga tawo panahon sa pandemya. Ang nagpadagan sa kalibotan panahon sa kangitngit nga nagputos kanato tungod sa Covid mao ang mga yano nga mga tawo. Hilom lang sila nga mingsilbi sa uban. Mao kini ang “brand” ni San Jose.
Gipili sa Dios nga mahimong ama-ama si Jose ni Jesus. Mag-uuma ang Ginuo. Gawasnon siya nga nagbaton niining maong katungod sa pagpili sa iyang mga instrumento sa kaluwasan. Ang pamaagi sa mag-uuma milakip sa pagputol ug pagpul-ong. “Ang wala mamunga pagaputlon, ug ang tanan nga namunga iyang pul-ongan aron labaw pang mamunga,” nagkanayon ang ebanghelyo. Nagpadayon ang pahimangno ni Jesus, “Kamo nga mga hinlo na tungod sa pulong nga gisulti ko kaninyo, pabilin kamo kanako ug ako magpabilin kaninyo.”
Sakit ning mapul-ongan apan gikinahanglan kini aron molabong pa gayod ang maong sanga ug mamunga og daghan. Apan dili kini lamang ang tumong sa pagpul-ong. Pul-ongan diay ang sanga aron magpabilin kini nga lig-on sa punoan.
Walay hunong ang pagpul-ong sa Ginuo kang San Jose. Sa dihang morag nahan-ay na ni Jose ang iyang kinabuhi uban sa iyang asawa nga si Maria, giuyog ang iyang laraw. Nagmabdos ang iyang asawa sa lalang sa Espiritu Santo. Buot patyon ang batang Jesus. Nagpuyo sila isip mga langyaw sa layo nga lugar. Matag hagit, daw gipul-ongan. Niining paagiha milambo ang pagtuo ni Jose.
Mabasa sa Mga Buhat ang proseso sa pagpul-ong ni Saul ug sa Kristohanong katilingban sa Jerusalem. Tungod sa kanhiayng pagpanglutos ni Saul, hadlok ang mga magtutuo kaniya. Maayo na lang nga dinha si Bernabe nga misaksi sa iyang kabag-ohan. Gipul-ongan pod si Saul kay nabag-o ang iyang panglantaw sa mga sumosunod ni Cristo. “Nalig-on ang iglesia ug midaghan pinaagi sa panabang sa Espiritu Santo, ug nagkinabuhi sila nga mahadlokon sa Ginuo.” Nahitabo kini kay nag-agi sila og pagpul-ong.
Gitudlo sa sulat ngadto kang Juan nga “kinahanglan nga matuod gayod ang atong gugma ug dili sa pulong lamang.” Mahitabo kini kon tumanon nato ang mga sugo sa Dios. Niining paagiha lamang kita magpabilin sa Dios ug ang Dios ngari kanato. Ang malahutayon ug kinasingkasing nga pagbuhat sa kabubut-on sa Dios taliwala sa mga kalisdan, usa ka matang sa pagpul-ong.
Pagaputlon sa mag-uuma ang patay na, sumala sa ebanghelyo. Apan pul-ongan ang buhi pa aron molabong pa kini ug mamunga og daghan. Mao kini ang kinabuhi ni San Jose nga “hinlo na tungod sa pulong nga gisulti” sa Dios kaniya. Gidawat ni San Jose ang pulong sa kaluwasan nga gipahayag kaniya pinaagi sa mga damgo. Angay siyang pasidunggan ug sundon.
Kumusta man ang imong relasyon kang Señor San Jose? Imo ba sad siyang giisip nga imong ama-ama?