NALIPAY na unta ako nga nakabasa sa statement ni Presidente Rodrigo A. Duterte nga tahuron ang workers’ rights. Naa say pamahayag ang kapulisan sa Syudad sa Sugbo nga maximum tolerance.
Dayon kalit ko nga nakadawat og chat nga dunay 14 nga motambong unta sa Labor Day rally dinhi sa Syudad sa Sugbo ang gidakop sa kapulisan kay wa kuno motuman sa social distancing. Dayon gipabayad og P500. Gipaabot nga ipa-community service diha sa SRP.
Mao diay kini ang buot ipasabot sa pagtahod sa workers’ rights? Mao sab kini ang buot gipasabot sa maximum tolerance? Botbot ra diay.
O basin ng kapulisan di na motuo kang Presidente Duterte?
WPS
Ato man sab gud nga nabantayan nga ang atong kasundalohan nagpalig-on na sa pwersa diha sa West Philippine Sea. Maisugon ang pamahayag ni Sec. Delfin Lorenzana.
Apan sukwahi kining gipakita sa kasundalohan sa baruganan ni Presidente Duterte. Nagpasabot ba kini nga nagkawalay actual authority si Digong sa pagka karon? Maingon na ba nato nga lame duck kini siya?
Sa laing bahin, di lang diay 11 ka senador ang supak sa pagkalihokan sa China diha sa West Philippine Sea. Apil sab diay sa ilang hut-ong si Sen. Manny Pacquiao nga, giingong naulahi sa pirmahay nga didto siya sa Sen San.
Atong nasayran nga duna diay sulat ang senador nga gipadala sa embahada sa China nga nagprotesta sa pagpundok sa mga barkong Insek sa atong teritoryo.
Buot ipasabot, supak siya sa gibuhat sa Insek. Sukwahi sab ang iyang baruganan sa gipamahayag ni Presidente Duterte.
Ambot lang niining atong giingong isog nga Presidente, kutob sa man sa pagpamalikas sa oposisyon, sa mga Walhon, ug mga lider sa ubang mga nasud nga wa siya makauyon.
Apan nanubra ang iyang paghigugma sa China.
Nasayran ra ba nato nga dunay mga isla nga gipang-ilog ang China karong panahon na ni Digong ug walay bisan eek intawon ang atong presidenteng isog mamalikas sa uban.
Samtang ang atong mga silingang nasud sama sa Vietnam ug Indonesia mosukol sa China, diay Digong nga nahadlok bisan mamalikas na lang. (DM @anol_cebu)