MALAMPUSON ba ang gihimo nga internal cleansing sa atong hut-ong sa Philippine National Police (PNP)? Sukad sa paglingkod ni Presidente Duterte sa 2016, iyang gisugdan ang paglimpiyo sa PNP gikan sa mga salawayon sa organisasyon. Daghan nang mga PNP chief ang nangagi. Ang atong pangutana, nagmalampuson ba ang ilang pagtangtang sa mga salawayon?
Daghan tuod ang nangatangtang. Nangamatay man gani ang uban nga sa atong paminaw ang paglikidar kanila mando gikan sa hitaas. Apan bisan pa niini, nagpabilin nga hugaw ug maot ang imahin sa kapulisan. Kini gumikan kay daghan gihapon diha nga mga salawayon nga nagpabilin sa organisasyon. Malimpiyo lang siguro ang PNP kon wagtangon o i-abolish. Dili man hinuon tanan nagpabadlong apan nagpabilin gihapon ang ilang mga binoang.
Ang atong mga opisyal sa PNP hilabihang naningkamot nga malimpiyo na unta ang ilang panagway atubangan sa katawhan nga ilang gi-alagaran. Ila kitang gipatuo nga aduna silay mga sumbanan o mga giya nga gituman aron mahagpatan na ang ilang organisasyon sa hiwi nga mga ginsakpan. Apan sama sa balak, katunga sa ilang pamahayag ingon og sa tawo nga nagmata apan gibutaan sa kangitngit ug ang laing katunga daw sama sa usa ka tawo nga labihang kahinanok taliwala sa kahayag. Nagdamgo pa gyud sa udtong tutok.
Magbalik-balik silag patuo kanato nga silay nag-unay-unay og laba sa ilang mga bulingon. Apan labihang dakoa sa ilang problema. Sa dugay na nga panahon maoy nakita sa kadaghanan ang pagtabon-tabon sa kamatuoran. Ang pagpabaha sa daghang pagpamakak o mga teyoriya sa mga sensationalized nga kaso nga wala kaayo maayong pagkadispuga ang script.
Ug ang tanan pulos lang ‘lip service’. Unsay may lip service? Kon Binisay-on, kini nagpasabot og mga pamahayag o panaad nga kutob sa pulong, wala sa buhat. Mao nay lip service nga kon ang mga marukoy pay pasultihon; ‘pulos lang atik-atik’. Mga atik-atik nga ang motuo kadto ra sab nga mga ‘uto-uto’. (bobbygnalzaro@gmail.com)