GIDAYEG ni Department of the Interior and Local Government (DILG) Secretary Eduardo Año si Mayor Edgardo Labella tungod sa maayong pagdumala sa kombate sa Siyudad batok sa pagsulbong sa mga kaso sa coronavirus disease 2019 (Covid-19).
Apan ang mayor, kinsa naila sa ka maayong tawo, nitubag nga di kini makab-ot kon wa pa ang ubang mga opisyal sa Siyudad, labina ang mga nagdumala sa Emergency Operations Center (EOC) nga gipangulohan ni Konsehal Joel Garganera ug mga lumolupyo sa siyudad nga kanunay nagsunod sa mga health protocol.
Bitaw, di baya lalim ang pagkombate sa pagsulbong sa Covid-19 kay ang uban ganing mga dapit gasangkiig sa mga kaso, galibog na unsay buhaton. Diha pay sugyot nga ipailawom ang Central Visayas, labina ang Dakbayan sa Sugbo, sa mas estriktong enhanced community quarantine (ECQ). Apan wa madayon kay nasagang sa Department of Health (DOH) 7 tungod kay mas andam ang Siyudad.
Gikan sa 3,000 kapin ka mga kaso, ubos na kini karon sa 1,000. Sa umaabot nga mga adlaw, mominos pa kini kon maka recover na ang mga nangataptan nga naa sa mga isolation center ug tambalanan.
Angay usab daygon si Labella sa iyang paghangyo sa nasudnong kagamhanan nga tugtan na ang Siyudad sa pagpalit og mga bakuna sa Covid. Nganong angay man daygon? Kay gawas nga mopadali kini sa vaccination program sa Siyudad ug sa nasod sa kinatibuk-an, matabangan pa ang ubang mga dapit sa nasod sa ilang pagkombate sa mananakod kaayong sakit.
Inay nga anhi ihatag ug ibubu ang mga bakuna, mahiadto kini sa ubang mga local government unit (LGU) nga way kapabilidad sa pagpalit og mga bakuna kay kuwang ang panudlanan. Pinaagi usab niini, makuhaan ang palas-unon sa nasudnong kagamhanan sa gasto.
Di lang kay ang Dakbayan sa Sugbo ang tugtan, hasta sab ang ubang mga LGU nga nagtagana og pundo.