GRABE na kaayo ang trend karon sa biseklita tungod sa pandemic. Kaniadtong mga 2010 daghan man tuod mi, apan mas grabe na karon tungod sa coronavirus disease 2019. Unya, ang kabukiran karon anam na sab nga napuno sa mga establisemento, sagad mga kanan-anan ug coffee shop.
Sa may karsada padung sa Barangay Guba agi sa Barangay Pulangbato, naa nay pipila ka kan-anan nga nitumaw. Tungod kay nakakita tingali sila sa nagkadaghan nga mga siklista. Sa akong tan-aw, moabot ang panahon nga magtambay na sab ang mga magmotorsiklo tungod kay gawas nga di crowded, maanindot sab ang mga talan-awon gikan sa ibabaw ngadto sa ubos.
Kon kaniadto sagad ming mga siklista kutob lang sa Danao City, karon bisan hangtod sa Catmon daghan na ang manglahos. Nakit-an ni nako dihang namiyahe mi sa akong misis nga si Chelo sa Bantayan niadtong miaging semana. Alas 5 mi namiya sa balay, apan grabe na ka daghan sa mga siklista, nag mountain ug road bike. Naa pay uban nga way pakialam sa mga sakyanan nga nagdagan, akoy gikuyawan nga gatan-aw. Dihay grupo nga akong giminuran ug gisultihan nga usa nila hapit na maigo sa bus.