97 anyos nga lola miapil sa PRO 7 Barangayanihan

BISAN SA EDAD: Si Conchita Vidal (tuo, kilid), 97, taga Barangay Sambag 2, Dakbayan sa Sugbo, usa sa mga mipahimulos sa Barangayanihan pantry sa Police Regional Office (PRO 7) sa Sabado, Mayo 1, 2021. Bisan sa iyang pangedaron, nanglimbasog si Lola Conchita sa pag-apil sa linya. / ARNOLD Y. BUSTAMANTE
BISAN SA EDAD: Si Conchita Vidal (tuo, kilid), 97, taga Barangay Sambag 2, Dakbayan sa Sugbo, usa sa mga mipahimulos sa Barangayanihan pantry sa Police Regional Office (PRO 7) sa Sabado, Mayo 1, 2021. Bisan sa iyang pangedaron, nanglimbasog si Lola Conchita sa pag-apil sa linya. / ARNOLD Y. BUSTAMANTE

TALIWALA sa naglagiting nga kainit sa adlaw, nangunay sa paglinya ang 97 anyos nga lola aron lang makakuha sa mga hinabang sa Police Regional Office 7 sa gilusad nila nga Barangayanihan nga gisugdan kagahapon, Mayo 1, 2021, atol sa Adlaw sa Pamuo.

Si Conchita Vidal, lumad nga taga Ubay, Lalawigan sa Bohol apan kasamtangan nga taga Aznar, sitio Pailob, Barangay Sambag 2, Siyudad sa Sugbo nagkanayon nga diha siya sa Fuente Rotunda nanguhag basura, apan giapas siya sa iyang anak nga usa usab ka mamasurahay nga adunay gipang hatag nga para konsumo sa PRO 7.

Bisan sa iyang pangidaron nagdali siya nga milakaw paingon sa Camp Sergio Osmeña aron moapil sa taas nga linya uban sa mga tawo gikan sa mga kasikbit nga barangay duol sa kampo.

Apan nabantayan siya sa mga personnel sa PRO 7, gipauna siya sa pagpalinya aron dili mosaka ang iyang presyon.

Gawas sa mga konsumo sa kusina sama sa gulay, bugas, delata, lagotmon ug mga lamas ,gihatagan usab siyag hygiene kit ug tambal alang sa iyang sakit sa lawas.

Matod niya nga aduna siyay upat ka anak ug mihulagway sa ilang pagpuyo nga lisod kaayo sanglit nagsalig lang sila sa kita nila sa ilang pagpamasura.

Misamot pa karon nga nasinati ang Covid 19 pandemic diin dili na siya maka gawas-gawas tungod sa iyang pangidaron.

“Lipay kaayo ko nga nakadawat kog bugas ug mga gulay. Karon pa ko sukad naka dawat ingun ani ba. Nagpuyo ko diha sa Sambag 2, 56 ka tuig na. Karon pa gyud ko nakadawat og hinabang gikan sa kapulisan,” matod ni Lola Conchita.

Gibuksan sa PRO-7 ang Barangayanihan nga dungan usab nga gihimo sa mga police office sa tibuok Central Visayas.

Nangulo sa maong kalihukan ang hepe mismo sa PRO-7, Police Brigadier General Ronnie Montejo, uban sa iyang kapikas sa kinabuhi.

Matod ni Montejo nga nagtagana silag pundo alang sa programa, apan aduna usay mga abag gikan sa mga pribadong kompaniya.

“Naa pud tay gipalit ani nya daghan sad ang nitabang pud namo nga naa diri karon. Aside sa mga unit sa PNP, duna pud tay mga sectoral groups nga manggihatagon og kasing-kasing nga business sector, nitabang pud nato diri,” matod ni Montejo.

Magpadayon kini sigun ni Montejo hangtod nga adunay pay moabag kanila sa pag hatag sa mga pagkaon.

Abli usab ang kapulisan sa pagdawat sa ihatag ni bisan kinsa lakip na sa mga politiko apan pasidaan lang niya nga dili lang sagulan sa politika ang ilang pagtabang.

Daghan ang naka benipisyo sa unang adlaw sa barangayanihan nga gibana-bana nila nga dul-an sa usa ka libo ang nahatagan.

Gawas sa mga pagkaon, ang Regional Health Service 7 nanghatag usab og mga tambal ug bitamina alang sa pagpa lig-on sa resistensya.

Aron masiguro nga masunod ang minimum health standard, adunay mga pulis nga mamadlong aron ipatuman ang social distancing. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph