KONTROBERSYAL nga kanhi hepe sa Argao police station, ex-police major Ildefonso Miranda nitahan sa kapulisan sa Bogo, Huwebes sa kaadlawon, Abril 30, 2021, pinasikad sa warrant of arrest nga giluwatan ni Judge Noel Darren Damian sa Regional Trial Court (RTC) Branch 26 sa lungsod sa Argao sa kasong duha ka counts sa direct bribery.
Matod ni Police Master Sergeant Joel Bino, desk officer sa Bogo City police station, nga pasado alas 5 sa kaadlawon, nitahan sa ilang buhatan human migawas ang iyang warrant of arrest.
Si Miranda lumad nga taga barangay Taytayan, Dakbayan sa Bogo ug didto na nanimuyo human siya gipapha sa serbisyo tungod sa iyang kaso nga giatubang sa dihang naatlan siya sa mga sakop sa Integrity Monitoring and Enforcement Group (IMEG) Visayas Field Unit niadtong Marso 5, 2020 nga nakig dulog sa iyang piniriso nga babaye.
Naka gawas hinuon dayon si Miranda human mipyansa og P120,000 sa korte sa dakbayan sa Bogo.
“Mga around 5 am April 30 2021, personal ni siya nga miari sa police station kay naa siyay warrant. Mao to gi effect ang arrest nato sa iyaha,” matod ni Police Master Sergeant Joel Bino.
Niadtong Marso 5, 2021 sa alas 11 sa gabii, ang IMEG Visayas Field Unit nironda sa Argao police station human makadawat og report nga ang dinakpan nga si Jenie Villanueva sa kasong pagpamaligya sa illegal nga drugas wa gisulod sa selda, inay sa iyang kwarto.
Naabtan pa sa mga operatiba si Miranda nga nakig dulog kang Villanueva sa iyang lawak.
Sa dihang dalhon na unta sa mga sakop sa IMEG, nisuway siyag suborno sa mga operatiba makaduha ka mga higayon nga maoy hinungdan nga gipasakaan siyag kaso.
Pagka Abril 20, 2020 gipirmahan ni Police Brigadier General Albert Ignatius Ferro nga mao pa ang hepe sa Police Regional Office 7 niadtong panahona ang dismissal order kang Miranda.
Matod ni Ferro nga ang pagkataktak ni Miranda sa serbisyo nagsilbi nga warning sa tanang pulis nga dili mobuhat sa bisan unsa nga illegal nga kalihukan. Nangayog pasaylo si Miranda kang Ferro kay matod niya igo ra siya nahigugma sa sayop nga babaye.
Human sa dismissal order kaniya, wala na mopakita pa si Miranda sa PRO-7 ug giingong naa nalang sa iyang panimalay sa dakbayan sa Bogo. (AYB)