KATORSE ka mga sakop sa militanteng pundok nga padung sa himuon nga lihok protesta atol sa Adlaw sa Pamuo gahapon, Mayo 1, 2021, gipang sikop sa mga sakop sa Abellana Police Station nga nag checkpoint sa General Maxilom Avenue, Dakbayan sa Sugbo.
Ang mga sakop sa Nagkahiusang Kabus sa Lapu-Lapu (NAKALAP) nga kabahin sa grupong Kadamay, sakay sa usa ka van for hire nga mopaingon na unta sa ilusad nga rally apan tungod sa ilang ka puno, napara sila sa checkpoint.
Matod ni Police Major Armando Labora, hepe sa Abellana Police Station, nga mihimo silag checkpoint kagahapon sa buntag isip kabahin sa ilang naandan nga trabaho.
Ilang gi susi ang tanan nga mangagi nga sakyanan.
Usa ka van nga itom nga adunay tatak nga EST nga nakapaduda nila kay puno, ngang gipara ug dinhi nasuta nga adunay sakay nga 14 ka pasahero nga unta napulo lang ang kapasidad niini.
Gipasabot ni Labora nga naa pa sa modified general community quarantine (MGCQ) ang dakbayan sa Sugbo ug aduna pay gipatuman nga executive order gikan sa mayor nga i-obserbar ang minimum health standard.
Gipasa sila sa Prevention, Restoration, Order, Beautification, and Enhancement (PROBE) sanglit sila man ang ahensya nga gitahasan sa Kagamhanan sa Siyudad sa pagpahamtang sa silot labot sa kalapasan sa health protocol.
“Na hold nato sila sa checkpoint kay pag check nato overloaded ang katong ilang gisakyan nga van. So, after ana, Sir, violation sa health protocol sa executive order ni Mayor among gidala sa Probe team,” matod ni Labora.
Giklaro ni Labora nga wala silay tumong nga ang mga militante ang ilang pugngan sanglit routine na matod pa sa ilang trabaho ang checkpoint ug wa sila mo gukod sa mga walhong grupo.
Gani matod niya gipasagdan lang nga magmartsa ang mga progresibong grupo atol sa Adlaw sa Pamuo gikan sa Fuente Osmeña rotunda paingun sa dalan Colon ug milahos sila sa Plaza Independencia sanglit ila kining katungod.
Dugang ni Labora nga malinawon ra ang ilang programa ug wa usab silay bayolente nga binuhatan nga namauli ra usab dayon human naka pamulong ang ilang mga leader.
Gibana-bana ni Labora nga naa sa 150 ngadto sa 200 ang misalmot sa kalihukan gikan sa nagka lain-laing grupo.
Dihang gikuhaan sa habig, si Jaime Paglinawan, chairman sa Alyansa sa mga Mamumuo sa Sugbo-Kilusang Mayo Uno (AMA Sugbo-KMU), nihulagway sa gibuhat sa mga pulis nga harrassment.
“Among gikondenar ang pagpangharas sa kapolisan sa atong mga kaigsoonan karon nga gi-detain karon,” si Paglinawan nagkanayon.
“Klaro man g’yod na nga ang bus dunay protocols g’yod diha. So, ang among tan-aw ana, pangpangharass na g’yod ni sa mga mamumuo ug kabus karon nga mag protesta atol aning adlaw karon sa Labor Day,” dugang niya.
Matod ni Paglinawan nga base sa ilang pasiunang impormasyon, ang 14 sakay sa usa ka bus dihang sila gipahunong sa may General Maxilom Avenue ug gidala sa Cogon Ramos gym.
Matod niya nga nakig coordinate na sila sa ilang legal counsel kabahin sa pagkasikop sa 14 ka sakop sa Kadamay. (dugang taho ni WBS)