NAKATALA og 70 ka mga bag-ong kaso sa coronavirus disease (Covid-19) ang Cagayan de Oro, pulos mga local transmissions, sumala sa report sa City Health Office Sabado, Mayo 1.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 4,896.
Matud sa City Health Office, sa 70 ka mga bag-ong lokal nga kaso, walo ang mga lokal authorized persons outside residence (Apors), 31 ang mga local index nga mga kaso, 30 ang mga local case with link, ug usa ang patay.
Sa 4,896 nga kinatibuk-ang kaso sa Covid-19 sa syudad, 437 ang mga returning overseas Filipino workers/locally stranded individuals (ROFs/LSIs) ug 4,459 ang mga local transmissions.
Ang Cagayan de Oro adunay 475 ka mga active cases, 110 niini na-admit sa Northern Mindanao Medical Center ug uban pang mga ospital sa syudad, 362 ang mga outpatients, ug tulo ang mga ROFs/LSIs.
Nakatala usab og pito ka mga Covid-positive nga mga kaso nga karon naka-recover. Anaa na karon sa 4,204 ang ihap sa mga nakarekober nga mga kaso sa dakbayan.
Sa maong numero, 310 ang mga LSIs, 122 ang mga ROFs, ug 3,772 ang mga lokal nga kaso (community: 3,207; Apors: 565).
Ang ihap sa mga namatay sa Covid-19 sa syudad naa sa 217.