Mag-usa ka tuig na ug tunga kining coronavirus disease 2019 (Covid-19), 17,000 na kapin ang nangamatay sa atong mga igsuong Pilipino, ug kapin sa usa ka milyon na usab ang natakdan.
Dinhi sa atong nasud, maayo nang pagkahugno sa atong ekonomiya. Dinhi lang sa atong siyudad sa Davao, upat na ka 5 star hotel ang nagsira ug naturalmente apektado ang mga kawani niini, ug padayon nga gisuportahan sa atong gobyerno pinaagi sa pundo sa atong Department of Labor (Dole).
Gawas niini, aduna pay mga dagko ug gagmay'ng mga kompaniya nga dugay rang nanira dinhi.
Makapangutana kita, asa na kaha sila karon ug unsa na kahay ilang kahimtang?
Duna ta'y nahibaw-an nga nanguli sila sa ilang probinsiya, apan mao gihapon nagpait ang kahimtang karon sa atong mga mag-uuma sa probinsiya tungod kay way maayong abot ang ilang pagpanguma.
Pero wala kitay nabalitaan nga dunay nangamatay tungod sa kagutom kay wala nay gipanglamoy.
Namatay sa Covid-19 daghan, pero nalunosan kay walay pamahaw, paniudto ug panihapon wala. Sa ato pa, basta mohilok lang ang tawo ug dili magsige'g hangad sa atong gobyerno, maka-survive ra gihapon ta.
Aduna koy nahinumdoman sa paglingkod ni Cory Aquino isip Presidente, human sa People's Power niadtong 1986, nagkahiusa ang mga senador nga wagtangon ang US Military bases, daghan ang komentaryo nga kuno daghan ang mga pasmo kay lagi mawad-an og trabaho?
Pero human sa pipila ka tuig ang milabay, wa may namatay sa gutom kay wa nay trabaho? Mga babaye hinuoon nga mugbo og lupad ang nagtiyabaw, kay dina man sila mokita og dollar.
Karon atong namatikdan nga usahay mosupak na ang pipila ka mga tawo sa mga protocols kay lagi nangita na'g paagi kon unsaon nga makatrabaho para mabuhi, dili ug dili na ta makasalig sa gobyerno.
Asa kaha kutob kining Covid-19? Walay tawo nga makatagna og kanus-a kini mawala. Diyos lang ang nahibalo kon kanus-a kay dako ang atong pagtuo tungod sa kadako na sa mga kasal-anan sa tawo ning kalibutan, basi'g iya ning pagbuot?
Migamit siya'g nasud ug maoy magsabwag og virus para silotan ang katawhan.
Sama sa gihimo sa Diyos kang Job nga gigamit si Satanas para sakiton si Job ug taptan og daghang mga sakit.
Pero bisan pa'g seryuso natong giatubng kining Covid-19, apan di gyud magpalupig ang politika bisan og layo pa kaayo kanunay gyud siyang magpa-ibabaw. Kon adunay original "Sara Run Sara," gisundog na pod ni Manny Pacquiao sa Davao del Sur kay aduna nay tarpaulin nga "Manny Run Manny."
Pero para sa ako usa ra'y pinaka-original nga mao si Niel Sedaka, "Run Samson Run," pero dili politika.