MITAHAN ngadto sa kapulisan ang mayor nga giingong lider sa Private Armed Groups (PAG) alas 11 sa buntag, Sabado, Mayo 1, Pagalungan, Maguindanao Province.
Ang Mamasabulod Private Armed Group nga gipangulohan ni Pagalungan Mayor Datu Salik Mamasabulod misurender mismo kang Police Regional Office-Bangsamoro Autonomous Region (PRO-BAR) Regional Director Brigadier General Eden Ugale.
Gisurender ni Mamasabulod ang iyang duha ka security escort nga sila retired Police Corporal Faisal Mamasabulod alyas Fai nga iyang igsuon ug Norodin Sulayman nga pulos molupyo sa Barangay Damalasak, Pagalungan.
Apil sa gitahan sa mayor ang iyang duha ka M16 assault rifles, usa ka M1 Carbine rifle, usa ka M1 Garand rifle, mga bala ug magazine.
Ang pagsurender sa Mamasabulod Private Armed Group kabahin sa pagsunod sa mando sa National Task Force on the Disbandment of Private Armed Groups (NTF-DPAGs) ilawom sa normalization track sa Comprehensive Agreement on the Bangsamoro nga nakatutok sa pagbungkag sa mga armadong grupo sa Bangsamoro Autonomous Region in Muslim Mindanao.
Gipamahayag ni Ugale nga nahimo sa NTF-DPAGS nga mapadali ang pagsurender sa mga PAGs.
Ang grupo ni Mamasabulod maoy gitumbok nga di-listed active PAG sukad Marso 15, 2021 sa PRO-BAR.
Giaghat ni Ugale ang uban pang lokal opisyal sa nahisgutang probinsiya nga dunay mga armadong sakop nga isurender sa kapulisan o militar susama sa gihimo ni Mamasabulod.
Plano sa gobyerno nga i-agi sa tama nga proseso ang mga armadong security escorts sa mga politiko o ipailawom sa pagbansay isip Cafgu Active Auxiliary o Barangay Peacekeeping Action Team. (Edgar E. Fuerzas)