GIANGKON sa City Transport and Traffic Management Office (CTTMO) nga ang koleksiyon sa parking fees sa Siyudad sa Davao naapektuhan tungod sa Covid-19 pandemic ug padayon nga pag-ayo sa mga kalsada.
Matud ni CTTMO Head Dionisio Abude sa usa ka press conference nga moabot og P20,000 matag adlaw ang nawala tungod sa nagpadayon nga pag-ayo sa mga dalan nga gihimong mga "pay parking areas".
"From Febuary 2020 to February 2021, naa gyud diperensiya," butyag ni Abude.
Dugang niya nga ang siyudad nalugi sa dihang ang dakbayan mikambyon ngadto sa enhanced community quarantine (ECQ) gikan Abril hangtud Mayo 15, 2020. Nibalik lang ang koleksiyon sugod Mayo 16 sa miaging tuig.
Kahinumdoman nga gipahibawo sa CTTMO niadtong Oktubre 2019 nga mosugod na ang Public Pay Parking Zones sa mga dalang San Pedro, Ilustre, Pelayo, Iñigo, Villa Abrille, Monteverde, ug Duterte sa Enero 2, 2020.
Nasayran nga mga pag-ayo sa dalan molungtad pa hangtud sa Disyembre sa mga dalan sa Monteverde, Pelayo, Iñigo, ug San Pedro.
Ang 28 ka mga public pay parking enforcers nga naapektuhan sa pagsuspende sa pay parking scheme ibalhin ngadto sa mga bag-ong pay parking area nga mao ang Magallanes (Pichon), Marfori, Bolton, nga gisugdan sa pagpatuman sugod Mayo 1. (Ralph G. Llemit)