NAGUOL ang usa ka biyahedor og prutas nga taga Surigao del Sur human iyang nasayran nga giaprobahan na sa Regional Inter-Agency Task Force (RIATF) ang hangyo sa siyudad nga ipatuman ang "semi-closed border" sa Davao Region aron maseguro nga mga essential travelers lang ang makasud sa rehiyon.
Sumala ni Department of Interior and Local Government (DILG) Davao Regional Director Alex Roldan nga ang local government unit (LGU) gayod niini ang istriktong mopatuman.
"Ang resolusyon katong guidelines gyud are subject for comments sa local government units kay sila man ang mo-implement," suma ni Roldan sa pakighinabi sa People's Television (PTV) 4 sa Davao.
Sumala sa biyahedor og prutas nga si Gregorio Jandayan, 48-anyos, taga Cagwait, Surigao del Sur nga maglisud siya kung pagsulod niya sa Davao ug sa bisan asa nga border sa Davao Region labi na kung pangayoan na siya og 72-hour negative reverse transcription-polymerase chain reaction (RT-PCR) test result.
"Lisud na gyud kaayo sayunan ka'g kamahal mag-pa-swab test, maayo unta'g kaisa ra ko mosulod sa Davao Region, pirme baya, pait kaayo kung kini mahitabo," ingon ni Gregorio.
Una niini, nagpahibalo nang daan si Davao City Mayor Sara Duterte-Carpio nga nagsumite og dokumento ang siyudad sa Davao sa RIATF alang sa sugyot niini nga semi-closed border.
"We already submitted to RIATF nga i-semi-close nato ang border sa Davao Region. We will also submit (document) na iimplement nato siya sa Davao City for further study pero dili siya sustainable kung dili siya region-wide," ingon ni Mayor Sara, Abril 26, 2021, atol sa Special Hour Program sa Davao City Disaster Radio.
Nanggawas sab ang mga nagkadaiyang komento sa netizens sa social media nga di na suma pa ka basta basta molaag.
Una naaprobahan sa RIATF ang dokumento sa Davao City, nakita sa awtoridad nga dunay pagluag sa lihok sa mga tawo.
Gani daan nang nabutyag ni Davao City Tourism head Generose Tecson nga daghan na nagapanuroy aron molulinghayaw padung sa Region 12 ug sa Surigao area.
Mas miigmat karon ang siyudad sa Davao human na-detect sa Isla sa Mindanao ang bag-ong variant sa Covid-19.
Alang sa bus drayber nga taga Barangay 25-C Poblacion, Davao City nga kon matigayon ang semi-closed sa mga borders sa Davao Region hayan nga mamingaw na sab ang mga pasahero labi na sa mga provincial operation routes.
"Mamingaw na gyud, turismo nato ani mohinay na sab, pero kaayohan man nato ni, kinahanglan sundon nato, maningkamot lang ta nga moubos ug mawala na gyud ang kaso sa virus," sulti ni Marcelino Ybanez, drayber sa usa ka bus company nga nagbiyahian Butuan-Davao vice versa.
Giklaro sa awtoridad nga kung taga Davao mas maayong dili una mogawas sa Davao Region kung dili essentials ang biyahe.
Ang Davao Region gilangkuban sa Davao City, Davao del Sur, Davao Occidental, Davao del Norte, Davao Oriental ug Davao de Oro.
Mga nagpuyo sa sikbit nga rehiyon sa Davao Region nga mao ang Region 12 sa Soccsksargen, Region 10 (Bukidnon area ngadto sa Cagayan) ug ang Surigao del Sur sa Region 13 sa Caraga gipahimangnoan nga kung dili importante ang lakaw nga mosulod sa Davao Region mas maayong dili mohinayon.
Nasayran nga sa hinanaling panahon mapatuman na kini.
Gihimo kini aron di matala ang kaso sa Covid-19 variant sa Davao Region.