Sa wala pa nahimong atleta ang Olympian nga si Mary Joy Tabal, pangandoy na niini nga malakip sa lista sa mga atleta nga nag-endorso sa Milo chocolate drink.
Sigon pa niini nga matag buntag sa iyang pagkutaw sa Milo chocolate drink, iyang makita ang hulagway sa mga atleta nga napatik sa sachet niini ug didto nagsugod ang iyang dako nga pangandoy.
Gihulagway ni Tabal ang iyang pangandoy nga “suntok sa buwan” ug bisan sa iyang mga damgo, wala siya magdahom nga matinuod kini.
Ang “suntok sa buwan” usa ka pasumbingay sa sinultiang Tagalog nga nagpasabot sa Bisaya nga “daw imposibleng mahitabo”.
Sa miaging tuig, hingpit na nga natuman ang pangandoy ni Tabal ug napatik na ang iyang imahe sa nationwide circulation sa Milo chocolate drink.
Matod sa 31-anyos nga si Tabal, nga dihang nagsugod pa siya sa running, iya nang makita ang commercial sa Milo sa telebisyon, lakip na ang mga hulagway sa atleta sa sachet.
Dugang sa Southwestern University alumna nga sa dihang makadungog siya’g Milo jingle sa Cebu City Sports Center, mag-goosebumps siya.
“Pangandoy gyud nako nga mabutang sa sachet sa Milo ug mahimong inspirasyon sa mga atletang Filipino,” padayag ni Tabal sa interbiyu sa SuperBalita Cebu.
Ang wala masuweto sa babayeng runner makapangutana kon giunsa niini pagkab-ot ang iyang pangandoy.
Si Tabal mao ang national champion sa Milo Marathon sulod sa unom ka sagunson nga katuigan gikan 2013 hangtod 2018.
Nahimo sad siyang unang babaye nga naka-qualify ug miduwa sa Olympics niadtong 2016 Summer Games sa Rio, Brazil.
Midaog pud si Tabal og gold medal sa 2017 Southeast Asian (SEA) Games sa Kuala Lumpur, Malaysia ug silver medals sa 2015 Singapore SEA Games ug 2019 Manila SEA Games.
Gisugdan ni Tabal ang iyang career sa dagan niadtong elementarya siya sa Guba Elementary School diin lakip siya sa relay team sa Central Visayas nga midaog og bronze medal sa Palarong Pambansa.
Pagsulod niya sa high school, mihunong si Tabal sa pagdagan kay mi-focus kini sa academics aron makakuha siya og academic scholarship sa kolehiyo.
Apan gidala siya pagbalik sa kapalaran ngadto sa paugnat sa kusog sa iyang pag-eskwela sa koheliyo sa Southwestern University diin nahimo siyang miyembro sa track and field varsity team isip usa ka sprinter.
Wa mosikat si Tabal isip sprinter ug didto na kini misulbong sa pagbalhin niya sa long-distance running ubos sa paggiya ni coach John Philip Dueñas.
Niadtong 2009, miapil si Tabal sa 10-kilometer nga lumba apan nakuyapan siya pag-abot sa finish line ug nakadawat siya’g mga pagsaway sa mga tawo nga nagpalibot kaniya.
Ang maong kasinatian gihangop ni Tabal nga usa ka dakong hagit aron mas mokayod pa siya og maayo.
Hinayhinay siyang mikulit og pangalan sa long-distance races sama sa 21K ug 42K.
Naabot ra gyud ang iyang gihuwat nga kahigayunan ug midaog siya sa National Milo Marathon sa tuig 2013. Sukad niadto nagpadayon na ang kalampusan ni Tabal sa long-distance running.
Nahimo pud siyang miyembro sa national team ug endorser sa mga produkto nga adunay kalambigitan sa paugnat sa kusog.
Tungod sa iyang kalampusan nakapundar si Tabal og iyang balay, nag-abli pud siya og negosyo nga Queen Mary’s Kitchen niadtong 2020.
Gikatakda na sab siyang ikasal sa sunod tuig human mi-propose ang iyang Philippine Navy nga hinigugma nga si Lieutenant Junior Grade Hector Dan Jimenez.
Matod ni Tabal nga wala siya’y sekreto, ang labing mahinungdanon mao ang pagkugi ug pagka-mapaubsanon lang kanunay.
Isip usa ka ambassador sa programang paugnat sa kusog sa Milo, giawhag ni Tabal ang mga kabatan-on sa pagsulod sa sports kay makatabang kini sa paghulma sa ilang abilidad sa duwa ug sa kinabuhi.
Ang Milo nagtanyag og bag-ong programa nga giulohan nga “Mula Noon, Hanggang Ngayon—Tuloy ang Pagiging Champion” alang sa mga batan-on nga dili pa makagawas sa balay tungod sa hulga sa pandemiya.
Libre kini og pwedeng sundon ang exercises pinaagi sa social Facebook page, Youtube account sa Milo Philippines.
Ang ubang impormasyon pwede pud tan-awon sa www.milo.com.ph.
Matod pa sa assistant vice president sa Nestlé Philippines-MILO nga Lester Castillo, ang paugnat sa kusog makatabang sa development sa mga bata, di lang sa duwa apan lakip napud sa academics.
Dugang niya nga ang values nga makuha sa paugnat sa kusog makatabang sa paghulma sa batan-on sa iyang pag-eskwela ug pagsulod na unya sa trabaho.
Si Tabal maoy usa sa labing malampuson nga nahimong mga bunga sa mga programa sa Milo sa paugnat sa kusog, gikan kaniadto hangtod karon.