SUPERBALITA CEBU

Nadela: Ayuda o politika?

Asoy Ni

NADUNGAGAN og usa ang listahan sa mga naangol sa Trans Central Highway kagabii. Ako ni nga nasayran gikan ni Kapitan William Genel sa Barangay Gaas, Balamban gahapon, Mayo 2. Iyaha ko nga gipakita sa nagusbat nga motorsiklo nga giparada atubangan sa barangay hall gahapon sa buntag. Sa miaging gabii, ang maong motorsiklo nga gimaneho sa usa ka Michael James Ates nga taga Opon, nidasmag sa nagparada nga sakyanan nga gimaneho ni Jeffrey Fernandez nga taga Kalunasan, Cebu City. Giingong nagkaon si Fernandez niadtong tungura sa kan-anan nga nahimutang sa sitio Pangpang.

Ang Barangay Gaas Vehicular Accident Toll Board nga gipabarug sa sitio Inaad ug sitio Mayana, nilista og 34 ang patay ug 95 ang angol sukad niadtong Pebrero. Tungod sa disgrasya gabii, 96 na ang running total sa mga nangaangol. Matod ni Kapitan Genel, angayan lang nga seryosohon sa mga motorista ang pasidaan, kon dili gusto nga makarga sa lista. Asoy sa kapitan, nga duha ka tuig ang nakalabay, pito ka kinabuhi ang nakalas sa ilang barangay sulod lang sa usa ka semana tungod sa disgrasya.

* * *

Sibaw na kaayo ang estorya labot sa piniliay sunod tuig. Mga pangalan sa posibling modagan sa nagkadaiyang posisyon gihisgutan. Sa social media, nagbaha ang mga komentaryo labot sa eleksiyon ug mga pilionon. Nanggawas ang daghang pangalan. May mga bag-o ug may mga karaan na sa politika. Para nako dili ni bag-o. Dili sab ni isyu kay nia man ta sa Pilipinas nagpuyo. Nahibalo naman ta nga kining politika paborito kaayong hilisgutan bisan naa sa kalisod.

Sukwahi sa pagsugod sa pandemiya sa miaging tuig. Coronavirus maoy sentro sa diskusyon bisan asang dapita. Lockdown, checkpoint, ayuda, SAP, ICT ug uban pa, init nga gituki. Listahan sa mga nangamatay, natakdan ug naka-recover sa Covid-19, gitutokan sa mga peryodiko ug labing pinaminaw sa mga balita sa radyo ug telebisyon. Karon naa man gihapon, apan medyo nibahar.

Politika na sab ang lamas sa kagutom, kahingawa, kabalaka ug kalibog samtang nagpadayon pagpanghasi ang pandemiya. Akong hangyo sa publiko, dili ta palingla sa maong salida. Padayon tang maningil sa mga gikinahanglang ayuda. Ayuda ug dili politika ang angay nga hisgutan.

Kanang mga pahiyom sa mga magpapili kuno, ayaw tagai og gibug-aton. Ang mga nindot nga pasalig ipalapos sa pikas dunggan. Kon mahimo, ayaw paminawa. Ang labing tukma ug haum nga angay natong mapaminaw mao ang tubag sa pangutana.

Asa na ang ayuda? Asa na ang trabaho? Ug asa na ang kwentada sa bilyones ka pesos nga pundo para pang alkuntra sa Covid-19? Sama sa nahitabo sa Estados Unidos, ang isyu sa pagdumala sa Covid-19, usa ka init nga hilisgutanan unyag abot sa panahon sa kampanya. Ang resulta sa piniliay sa pikas nga bahin, nalantawan nga sa gihapon diktahan sa kuwarta. Kana kon padayon tang magpaulipon sa salapi bugti sa pagpadaug sa usa ka pilionon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!