PADAYONG nikunhod ang positivity rate sa Covid-19 sa siyudad sa Sugbo, sumala sa Emergency Operations Center (EOC). Si Cebu City Councilor Joel Garganera, deputy chief implementer sa EOC, niingon nga 56 ra ang positibo sa 1,497 ka mga tawo nga nikuha og Covid-19 test niadtong Biyernes, Abril 30.
Ang positivity rate anaa sa 3.74 porsiyento, ang kinaubsan ning tuiga ug ubos sa five percent threshold sa World Health Organization. Apan sa tibuok buwan sa Abril, ang positivity rate anaa sa 9.37 porsiyento kay 1,724 ang nagpositibo sa 249,178 ka mga tawo nga nikuha og Covid-19 test.
Mas ubos gihapon kini sa 4,767 nga natala sa Pebrero ug sa 4,136 ka mga kaso sa Marso. Ang siyudad adunay 600 ka mga aktibong kaso sa Covid-19 ug 29 ang namatay kon itandi sa 51 nga namatay sa Pebrero ug 64 sa Marso.
* * *
Si Konsehal Garganera niingon nga 65 porsiyento sa namatay sa Covid-19 sa miaging buwan nagpangedaron og 60 anyos pataas. Mao nga maayong balita nga ipadayon sa siyudad sa Sugbo karong adlawa, Lunes, Mayo 3, ang Covid-19 vaccine rollout alang sa health care workers ug senior citizens.
Naundang kini sa Abril 23 kay nahutdan sa bakuna ang siyudad. Apan sa Mayo 1, nakadawat ang siyudad og 9,000 ka doses sa Sinovac vaccine gikan sa China. Si Vice Mayor Michael Rama, lead convener sa Vaccine Advisory Board (VAB), niingon nga unahon ang senior citizens nga bakunahan unta sa Abril 23.
Ang nadawat nga bakuna sa dakbayan di gihapon paigo alang sa tanang senior citizens sa siyudad. Mao nga wa nay vaccine storm. Ang pagbakuna mag-agad sa supply sa bakuna. Mora na ni sa tubig sa MCWD, usahay moagas, usahay dili.
* * *
Kanus-a pa man kaha makapalit ang siyudad sa Sugbo og mga bakuna sa Covid-19? Ang siyudad adunay gahin nga mokabat sa P400 milyones para ipamalit og bakuna. Si Cebu City Mayor Edgardo Labella nihangyo ni vaccine czar Carlito Galvez Jr. nga tugtan ang siyudad sa pagpalit og bakuna.
Wa isulti kon unsay tubag ni Galvez. Ang atong nahibaw-an gikan sa siyudad mao nga nipasalig si Galvez nga ang siyudad gahinan og 1.7 ka milyon ka doses sa Sinovac vaccine nga gitakdang moabot karong Mayo 7.
Ang Pilipinas nakadawat na og 3.5 ka milyon ka doses sa Sinovac vaccine, lakip sa usa ka milyon ka doses nga gidonar sa gobyerno sa China.