GISUGAT ang unang semana ning Mayo sa dobleng kalamboan alang sa mga pagpaningkamot sa kagamhanan ug awtoridad sa panglawas sa dakbayan sa Sugbo batok sa coronavirus disease 2019 (Covid-19).
Mobalik na karon, Mayo 3, ang Covid-19 vaccination rollout sa dakbayan human nadawat ang dugang 10,000 doses sa Sinovac gikan sa Department of Health (DOH) Central Visayas niadtong Biyernes, Abril 30.
Si Cebu City Vice Mayor Michael Rama sa Vaccine Advisory Board nagkanayon nga unang maatiman mao ang senior citizens sa waiting list ug kadtong nakadawat og text message niadtong Abril 23, kataposang adlaw sa unang paghatag og bakuna sa dakbayan.
Dili ba maayong balita? Senior citizens pangandam na.
Samtang, si Cebu City Councilor Joel Garganera, deputy chief implementer sa Emergency Operations Center (EOC), nibutyag sa padayong kalamboan tungod sa pagpilit sa talaan sa dakbayan ngadto sa 74 percent positivity rate sa Abril 30, 2021, ang labing ubos nga positivity rate sa 2021 sa pagkakaron.
Nagpasabot kini nga nagkaminus ang positibo sa pagpahigayon og Covid-19 test sa dakbayan.Makaingon kita nga salamat kang Konsehal Garganera sa paghatod sa maayong balita sa publiko.
Taliwala ning tanan, resulta usab kini sa hugot nga kooperasyon sa publiko sa kampanya sa lokal nga kagamhanan, ang importenteng bahin sa pagpakigbatok sa Covid-19.
Ug ang pag-abot sa dugang supply sa bakuna ug ang nagkaminus nga kaso sa naasoy nga sakit sa dakbayan sa Sugbo, makalipay nga dobleng kalamboan ngadto sa bag-ong normal. Ipadayon nato ang pagkooperar sa kampaniya sa pagtapos sa pandemiya. Hinaut nga magpadayon na kini.