DUL-AN sa 300 ka mga Oponganon sa isla sa Olango ang nahatagan sa ilang suweldo alang sa 14 ka adlaw nga pagtrabaho sa Tulong Panghanapbuhay sa Ating Disadavantaged/Displaced Workers o Tupad sa Department of Labor and Employment (Dole) 7.
Si Kongresista Paz Radaza sa bugtong distrito dakbayan sa Lapu-Lapu alang sa Kongreso, maoy niapud-apod sa mga benepisyaryo sa resibo sa money remittance diin kuhaon ang ilang sweldo niadtong Abril 30.
Ang kongresista maoy nangusog sa naasoyng programa nga mapahimuslan gayud sa mga Oponganon niining panahon sa pandemiya.
Gani sa tuyo nga mapalapdan pa ang pundo sa naasoyng programa alang sa mga Oponganon, giduol sa kongresista si Senador Joel Villanueva nga dali ra usab nisanong sa iyang hangyo.
Gibutyag sa kongresista nga nihatag ang senador og P950,000 nga dugang gahin sa Tupad alang sa dakbayan.
Ang naasoyng pundo napahimuslan sa mga benepisyaryo sa mga barangay San Vicente, Caw-oy ug Tingo sa isla sa Olango.
Ang matag benepisyaryo, nakadawat og tag P5,656 alang sa ilang 14 ka adlaw nga pagtrabaho sama sa paglimpyo sa palibot diin gipaagi sa money remittance ang pag apud-apod sa ilang sweldo.
“Nindot gyud ni ang Tupad program sa Dole. Aside sa makatabang sila sa ilang komunidad, makadawat sad ang atong mga kaigsuonan og sweldo para naa silay ikapalit sa mga panginahanglanon sa ilang pamilya. Busa, naningkamot gyud ko nga madungagan ang funding gikan didto sa kaulohan para diri sa Lapu-Lapu City,” matod ni Radaza.
Ang buhatan sa kongresista padayong bukas sa tanang Oponganon nga nanginahanglan og assistance sama sa medical, burial, financial ug educational assistance. (GCM)