Miabuso sa 2 ka lalake, gikasuhan

NITAHAN sa Santander Police Station ang usa ka wedding coordinator human malutsi og warrant of arrest sa kasong Acts of Lasciviousness nga iyang giatubang gumikan sa giingong pagmolestiya og duha ka menor de edad nga lalake.

Ang mitahan nailhang si Junjun (tinuod ngan gitago ning mantalaan samtang wala pa makuha ang iyang habig), hingkod ang panuigon, lumad nga taga Bato, Samboan apan kasamtangang nanimuyo sa Lilo-an, Santander diin nagbase ang iyang negosyo.

Matod ni Police Corporal Jennifer Bohol sa Women and Children Protection Desk sa Santander Police Station nga ang Regional Trial Court (RTC) Branch 62 sa lungsod sa Oslob niisyu sa warrant of arrest batok ni Junjun.

Kini human pasakai og kaso pinaagi sa regular filing human nga gireklamo sa duha ka menor de edad nga lalake niadtong Hunyo 2020.

Ang mga reklamante batok sa akusado molupyo ra usab sa lungsod sa Santander.

Gibutyag ni Bohol nga nigawas sa ilang gihimong imbestigasyon nga ang mga menor de edad nga biktima gigamit gayud sa akusado. Nunot niini, ang mga ginikanan na sa mga menor de edad ang nangusog sa pagkiha sa akusado.

Nasayran nga makadaghan na usab nga miatubang ang akusado sa subpoena gikan sa korte nunot sa padayong pagdungog sa kasong gisang-at batok kaniya.

Human hinuon masayod nga aduna siyay warrant of arrest, mitahan ra usab dayon ang akusadong si Junjun ug nipiyansa og P80,000.

“Naa siguro siyay kaila sa korte or unsa ba mao siya mismo niari nga duna siyay warrant ug nipiyansa sad dayon siya. Di na lang kaayo nato idetalye ang nahitabo (sa insidente) pero base sa mga menor de edad nga iyang biktima gigamit gyud kuno sila,” matod ni Bohol. (GCM)