DAVAO DE ORO -- Priso na ang usa ka maestra sa pampublikong tulunghaan, uban sa lain pang 5 nga giingong high value target human madakpi sa gilusad nga buy-bust operation sa hiniusang puwersa sa kapulisan.
Nadakpan ang magtutudlo nga si Dowey Eva Lago Tagud, giingong target list sa regional level, 40, ug dalaga didto sa Purok 2, Barangay Poblacion, Nabunturan alas 8:55 sa gabii niadtong Sabado.
Samtang ang lain pang lima nga nadakpan mao sila Aileen Quilisadio Alberca, 23, ulitawo, volunteer coordinator nga molupyo sa Purok 7, Valma, Barangay Ngan, Compostela; Alejandro Lago Tagud alyas Imbo, 34, ulitawo, way trabaho nga taga Purok 2, Poblacion, Nabunturan; Jomar Lago Tanaza, 35, empleyado sa JRS Express nga taga Purok 2 Poblacion, Nabunturan; Darwin Boiser Tusay, 29, ulitawo, laborer nga taga Purok 4, Poblacion, Nabunturan; ug Marlyn Delizero Panon, 25, dalaga, molupyo sa Purok 4 Poblacion, Nabunturan.
Subay sa report, nasayran nga ang magtutudlo ug uban pang suspek nadakpan pinaagi sa panag-alayon sa Philippine Drug Enforcement Agency, Nabunturan Municipal Police Station ug uban pang yunit sa kapulisan sa gilusad nga operasyon sa dapit.
Nasakmit gikan sa mga dinakpan ang 12 ka gramo nga shabu nga nagkantidad og P144,000, buy-bust money ug mga drug paraphernalias. (Dexter T. Visitacion)